Olaf Scholz-a chu Germany-a chancellor, thar atan lak luh a ni ta a, kum 16 zet ro lo rel tawh, Angela Merkel-i a thlak.
Scholz-a hi German parliament-ah chancellor tura thlan a ni a, a kaihhruai party pathum tangrualin bukna a paltlang rualin dinga zahna lantir zui a ni.
A kaihhruai centre-left Social Democrats chuan Greens leh sumdawngtute thlawp, Free Democrats nen ro an rel dawn a ni.
Scholz-a hnena thuneihna a hlan rual hian kum 31 zet politics-a lo tal tawh, Merkel-i politics nun pawh a tawp nghal a ni.
Mi zaidam tak, Scholz-a hi kum 63 mi niin September thla tawpa inthlana Social Democrats-in hnehna an channaa pawimawh tak a ni a. Merkel-i sorkarah khan vice-chancellor a nih mek bawk avangin chancellor ni tura rin a hlawh nghal phah hle bawk.
German ram rorelna, Bundestag-ah hian amah thlawpna vote 395 a hmuh laiin thlawp lo vote 303 a awm a, bukna a paltlang theih avang hian President Frank-Walter Steinmeier chuan dan angin chancellor pakuana atan a ruat zui ta a ni.
Parliament-a vote laka a chak hnuah hian Bundestag President Bärbel Bas chuan president-in a ruatna chu a pawm em tih a zawh chuan ‘aw’ tiin a chhang a. Bundestag-ah kir lehin rinawmna thu tiamtira lak luh a ni zui ta a ni.
Inthlan atang khan Scholz-a party hi Greens leh Free Democrats hian thawhhona thuthlung siam tumin an indawr reng a, Thawhlehni khan inremna an ziak thei ta a ni.
Merkel-i kut atanga an rama sanaa Nilaini tlai dar 3:00 atanga thuneihtu nihna latu, Scholz-a hian hmabak hautak tak hmachhawn tur neiin a pui turin cabinet member mi 16 a ruat.
A hmabak lian hmasa chu Covid-19 a ni a, tunah hian Germany hian hri leng thawh lina tuar mekin invenna latu an tam tawk lo chu an buaina a ni a. Invenna hi lak ngei ngei tura kalpui tur anga sawi rik mek a ni a. Darkar 24 liam ta chhung khan mi 69,601 zet kai hmuh niin mi 527-in an thihpui bawk.
Russia-in Ukraine ram a rûn mai ang em tih zawhna awm mekah pawh a inrawlh a ngai dawn.
Merkel-i kha politics aia sumdawnna ngai pawimawh zawk nia sawi thin a ni a. Scholz-a sorkar erawh chuan an rama sumdawnnain tuar dawn mah se a tul a nih chuan Moscow leh Beijing tihlungawi loh pawh an hnial lo tura ngaih a ni.