Philippines ram chu kumin chhunga thlipui na ber ni thei tur hiala ngaihin an ram khawchhak laili lam a pan mek avangin mi sang tam tak an chenna in atangin hmun him lamah suan chhuah an ni.
Philippine-a khawchin lam zirtu, PAGASA chuan Typhoon Rai hian hmar lama Surigao del Norte-a Siargao Island-ah an Ningani chawhnu khan khawmual a kai tan tih a sawi.
Ram chhung hmun thenkhatah thil nasa taka tichhe thei thlipui a keng tel dawn niin an sawi lawk a, vaukam velah chuan tui pawh a fawn sang dawn hle niin an sawi. Tlangram deuhvah chuan tui lian leh lei min pawh a thleng thei niin an sawi.
PAGASA chuan thlipui hi darkar khata km 195 thlenga chakin a thaw dawn a. A nasatna laiah chuan km 240 thleng pawh a ni thei tih an sawi bawk.
US Navy Joint Typhoon Warning Center (JTWC) pawhin Rai hi ‘super typhoon’ tiin an sawi.
Rai hi kumina Philippines nuaitu typhoon 15-na a ni tawh a, thuneitute chuan mi 1,00,000 velin an chenna in chhuahsanin hmun him an pan tawh niin an sawi.
International Federation of Red Cross & Red Crescent Societies pawhin tun tum typhoon, an rama Typhoon Odette an tih hi ‘kum 2021-a chak ber’ tiin an sawi a. Thlipui leh ruah avangin mi maktaduai tel chhiatna leh tui lian thlen thei a nih thu an sawi.
“Filipino-te hi an chhel hle a; mahse, he super typhoon hi chu a hmaa an lo tawrh tawh leh Covid-19 avanga buaiten thawh an tum mek laiin na zawkin an tuar dawn a ni,” tiin Philippine Red Cross chairman Richard Gordon chuan a sawi.
An rama chhiatna lam buaipuitu, NDRRMC chuan an ram bial pariatah chhiatrupna thleng nasa zual theia ngaiin inralrinna pawh an tichak bik tih an sawi.
Heng ram bialte hi an ram laili leh chhim lam, Visayas leh Mindanao thliarkara mi an ni hlawm a, mi maktaduai 30 chuang chenna a ni.
NDRRMC chuan sorkarin ei tur leh ni tin mamawh ang chi $ maktaduai 6.6 man vel a chhek sa thu a sawi bawk.
Philippines hi typhoon na tak takin kum tin a nuai ziah a. October maiah pawh khan Typhoon Kompasu chuan hmar lam leh khawthlang lam nuaiin mi 11 vel an thi a, mi pasarih chin hriat loh zui a ni bawk.
Dipolog-a disaster management hotu, Arvin Limare Bonbon chuan tuipui bul khawpuia cheng mi 1,38,000 chuang hmun himah an suan chhuah tawh thu a sawi.
Hna thawh pawh chawlhtirin online-a class kalte pawh hmun thenkhatah chuan an chawlhtir tih a sawi.
Philippine coastguard chuan chhim leh ram lailia lawngte chu dintir vekin mihring 4,000 chuang leh bungraw phura thawkte an ding vek tih a sawi a. Thlawhnate pawh thenkhat dintir an ni.
COVID-19 invenna pek pawh typhoon kalkawng turah hian tihtawp a ni a. Coronavirus avang hian tlan khawmna (emergency shelter)-ah awm khawm a rem loh avangin thil a buaithlak hle.
Eastern Samar-a Visayas chuan Governor Ben Evardone-a’n mi 30,000 dawn hmun himah an thiar chhuah thu a sawi a. Eastern Samar leh Leyte province te hi kum 2013-a Super Typhoon Haiyan-in na taka a nuai, mi sang chuang an thihna kha a ni.
Visayas khawchhak lamah pawh mi 17,000 chuan suan chhuah an ni bawk.
Surigao del Norte province-a Mindanao-ah chuan mi 51,000 chuang suan chhuah an ni.
Dinagat-ah Governor Arlene Bag-ao chuan chhungkaw 2,000 dawnin hmun hima insawn an duh tih a sawi.
Chhim lama vaukam khawpui, Tandag-ah chuan mihring 62,000 cheng zinga chhungkaw 3,668 chuan tual chhung sorkar hnenah insuan chhuah an duh tih an thlen a, awmna tur hmun 18 an siamah an dah khawm.
Cagayan de Oro leh Mindanao-ah chuan Ningani zing atang khan ruah a sur tam hle tawh a, social media-a thlalak tar lanah pawh hmun tam takah tui a lian tawh.