Excise & Narcotics Dept chuan Rs 2,22,70,057 hu ruihhlo a man khawmte Narcotics Drugs & Psychotropic Substances Act, 1985 (NDPS Act) hnuaia court-in tihchhiat a phal nia a sawi te chu nimin khan Excise & Narcotics Minister Dr K Beichhua’n tichhiain, a hal ral.
Bethany Multipurpose Farm, Phunchawnga ruihhlo tihchhiatna hun hmanah Excise Minister Dr K Beichhua chu khuallian niin thu a sawi a. “Hmingthat lak duh vang leh fak hlawh duh vanga ruihhlo do kan ni lo a. Vawiina ruihhlo kan tihchhiat ringawt pawh social media-ah sawiselna tam tak a awm mai thei a. Mi thenkhatin min lo sel mah se, kan tichhe zel ang. Kan hmelma do tur hian hnungtawlh a thiang lo,” a ti.
Dr K Beichhua chuan excise dept-a thawktu tlemte leh hmanrua tlakchhamna karah thalaiten an chhiatpui tur leh thihpui mai tur ruihhlo thahnem tak mana tihchhiat tur a awm hi thawktute taimakna leh thawhrimna vang a nih thu a sawi a. Khawvela thil huatthlala ber zing a mi, mihring nunin a ngeih loh em em, khawvel leh Zoram thalaiten an chhiatpui tawh, an chhiatpui mek leh an la chhiatpui zel tur ni bawk ruihhlo do kawngah hmanrua neih loh vangte leh mihring indaih loh vangte chhuanlama hmanga ngawih bopui mai tur an nih loh thu a sawi.
Ruihhlo do hna hi Excise & Narcotics dept (END) tihtur leh mawhphurhnaa nghat mai loa kohhran, tlawmngai pawl leh Zoram mipuite tanghoa do a tul thu sawiin, “Kan zavaia ruihhlo do hna kan thawk a nih chuan a hlawhtlinna a awm a. Indirect taka kan ram thalai te min tihhlum sak tu leh chhungkaw tam tak tah leh ha thialna thlentu he ruihhlo hi kan do tlan a ngai a ni,” a ti a; kohhran leh tlawmngai pawl tam takin ruihhlo do kawngah hma an la chu lawmawm a tih thu leh he hmalaknaah hian thinlung hmun khat pua phei khai rual taka ke pen anih loh chuan ruihhlo dona kawngah inhmuh thiam lohna te hi thil awm thei a nih thu a sawi bawk.
Thawktu indaih lo tih hre reng chunga theihtawp chhuah hma laa, Rangvamual-ah dept-in Outpost an siam chu rah duhawm tak a chhuah mek thu a sawi a. Kum thum kaltaa Rangvamual hmel leh tuna a hmel hi a hmu duh tan chuan hmuh theihin a danglam tih sawiin, “Chutih rualin, hmu duh lem loa sawisel te pawh an awm mai thei a. He’ngte avang hian kan hnungtawlh dawn lo a. Kan rilru a hnual phah tur pawh a ni lo a, min tichaklotu atan kan hmang tur pawh a ni lo. Theihtawp chhuahin beihpui kan thlak zel ang,” Excise minister hian a ti.
Dr K Beichhua hian tun atanga rei lo teah enforcement an neih belh dawn nia sawiin, “Covid-19 leng avang hian thawktu inlak belh hleithei loin kan awm reng a. Kum 2019-a physical test kan tih tawh kha tunah written test kan ti zo fel thei chauh a ni. Enforcement tilian zel turin sorkar pawhin hma a la dawn a ni,” a ti bawk.
Peter Zohmingthanga, Asst. Commissioner, END, pawhin thu sawiin, ruihhlote hi a kawltu leh man tute’n an lo chheprelh emaw, a ruka a lo tihral theihna laka venna atan hian India danpui, NDPS Act 1985, Section 55(A) hnuaiah a theih anga ranga tihchhiat theih turin a ruahman thu sawiin, vawiina ruihhlo an tihchhiat turte pawh court-in phalna a pek vek tawhte a nih thu, nimin khan a sawi.
Dan phalna hnuaia ruihhlo tihchhiat te hi heroin kg 8.331, Methamphetamine 2484 tabs, Tramadol Tabs 274 tabs, Alprazolam 1694 tabs, Cough Syrup 1039 phials, Ganja kg 237.025, NAP-10 148 tabs, Diazepam 2000 tabs te niin, tualchhung bazara Rs. 2,22,70,057 man hu a ni.
Excise & Narcotics Department-in ruihhlo an man vawiin a halral takte hi a hnuaiah hian tarlan a ni :
Heroin: 8.331 kgs (Hawng 695 x Rs. 30000) = Rs. 2,08,50,000
Methamphetamine: 2484 Tabs, x 100 = Rs. 2,48,400
Tramadol Tabs.: 274 Tabs x20 = Rs. 5,480
Alprazolam: 1694 Tabs. x 20 = Rs. 33,880
Cough Syrup: 1039 Phials x 250 = Rs. 2,59,750
Ganja: 237.025 kgs. x 3500 = Rs. 8,29,587
NAP-10: 148 Tabs. x 20 = Rs. 2,960
Diazepam: 2000 Tabs. x 20 = Rs. 40,000
TOTAL VALUE = Rs. 2,22,70,057