Iraq sorkar hnuai sia mahnia ro inrel hran theihna neia awm, an ram hmar lama Kurdish-a Erbil khawpuiah tun hnaia ruah sur nasa tak avangin tui a lian a, mi pariat vel thiin mi eng emaw zatin hliam an tuar bawk tih thuneituten an sawi.
Provincial Governor Omid Khoshnaw chuan thi zingah hian hmeichhia leh naupangte pawh an tel tih sawiin zankhuaa ruah a sur hnuah tui hi khawpui chhungah a lian ta vak niin a sawi.
“Tui lian avang hian nunna bakah thil dang tam tak chân a ni,” tiin a thuchhuahah a tar lang.
Tual chhung chanchinbu, Rudaw chuan tui lian avang hian mi pasarih thiin mi dang pakhat tekin a deng hlim bawk tih Khoshnaw hian a sawi tih a tar lang.
Mi eng emaw zatin hliam an tuar bawk a; mahse, hliam tuar leh thil chhia zawng zawng hi hriat kim theih a la ni lo.
Civil defence thupuangtu, Sarkawt Karach chuan mi tam takin an chenna chhuahsan an ngaih phah tih a sawi a. “Chin hriat lohva awmte pawh zawn mek zel a ni,” a ti bawk a. Thi hi an pun a hlauhawm hle niin a sawi.
Erbil khawpuiah hian chirh pawh a tamin kawngah a kawi nasa hle nia sawi a ni a. Bus, truck leh tanker pawh tui hian a la a, thenkhat an let bawk.
Khoshnaw chuan mipuite chu ni tin mamawh thil lama an chhuak a nih loh chuan ina tawm tlat turin a ti a, ruah la sur chhunzawm a rinawm avangin tui lian nasa zawk thleng thei niin a sawi.
Iraq ram hi khaw awm dan uchuak tak takin a lo nuai fo tawh thin a. Tun hnaiah pawh khaw lum uchuak tak tak leh khaw khengte pawh an tuar tawh a, hetih rual hian tui lian pawh an tuar a. Ruah a sur tam hian chirh tam tak a tawlhpui thin avangin an buai zual.
Chenna in leh lo bakah lei tha leh thlai tam tak an chân thin a ni.