Dr Lal Thanhawla chuan Congress party president nihna chu vice president ni lai, Lalsawta hnena a hlan.
Kumin chhung atana Congress Bhavan kharna leh MPCC OB tharte official-a puan chhuahna hun hman a ni a. October 10, 2021-a Congress party OB meeting-in a pawm tawh – president atan Lalsawta, vice president-ah Lal Thanzara leh treasurer atan Zodintluanga Ralte, MLA te appointment hi Lalthanglawra Ngurte, MPCC Secretary chuan a chhiar chhuak a ni.
He hunah hian president kal chhuak ta, Dr Lal Thanhawla chuan Congress president a nihnaah a term la hmang zo lo mah se, hruaitu thar leh tha zawkte tan hmun ken a ngai ve tawh nia hriaiin, a OB-puite hnenah a lo sawi tawh nia sawiin, “Keima thutlukna liau liau a ni,” a ti a; tu nawrna mah tel loa a chawlh tur thu a sawi.
Dr Lal Thanhawla chuan an hruaitu thar turte hi central-a congress party hruaitu, Sonia Gandhi pawhin a pawmpui tawh thu sawiin, “Hruaitu thar tha tak tak kan nei tawh a. Tangkaina ka neihnaah an hnungah ka ding tlat dawn a, full support ka pe a ni,” tiin, Congress party hruaitu tharte duhsakna a hlan nghal.
Congress party chu hruaitu tharte kaihhruaina hnuaiah a thawh leh ngei a tul thu sawiin, “Kan ram hi a tlu chhe mek a, chumi tungding tur chuan Congress party hi a thawh leh a ngai,” a ti a; inlungrual lohnain party a tihthan theih loh thu leh inlungrual taka hruaitute thusawi taka an kal a nih chuan sorkarna an kutah a awm leh tur thu a sawi.
MPCC president thar pawhin thu sawiin Mizoram kilkhawr ber thlenga mipuite hmuh theih hmasawnna zawng zawng chu Dr Lal Thanhawla kutchhuak deuh vek niin, hruaitu ropui tak a nih thu a sawi a. Tuna a thawhpui tur hi ram leh hnam tana nasa taka hna lo thawk tawhte an nih thu sawiin, “Congress sorkara Pu Zodintluanga hmalaknain khelmual tha eng emaw zat kan nei. Dipdugarh leh Guawahati-ah medical college a awm tih kan hre thin. Nimahsela, Dr. Lal Thanhawla leh Pu Lal Thanzara te hmalakna avangin medical college, MIMER tha tak kan nei ve thei a ni,” a ti.
Mihring lei theih chi hnih – nawhchizuar tih ang chi leh vote hmanga mi lei tumtute an nih thu, Lalsawta hian a sawi a. “Pawisa hmanga lei theiha min ngaituten leihlawn an dawh a, kan party candidate-te chu pawisa hmanga tlin theihna tur ang chiin an kal ve dawn lo,” a ti a; lei theiha ngaituten rama rorelna an chelh lohna turin dikna leh rinawmna vawn nun zel a ngaih thu a sawi a ni.