Thla hmasaa Congress a bânsan hnuah Amarinder Singh chuan Zirtawpni khan Punjab assembly inthlan lo awm turah BJP nen an thawkho dawn tih a puang.
Punjab chief minister hlui hian Delhi-a BJP hruaitute nen an inkawm hnuah an thawhho tur thu hi a sawi a. Twitter-a thlalak a tar lanah BJP Punjab in-charge, Union Minister Gajendra Singh Shekhawat nena an inkuah lai a lang.
“BJP nena kan thawhhona tur chu tihchian a ni ta a. Bial kan insem dan tur chauh kan sawiho a ngai tawh. Tunge ding dawn, khawiah nge a din ang tih chauh a ni tawh a, hnehna chang ngei turin bial hi kan insem kual ang,” tiin thuthar lakhawmtute hnenah a sawi.
“Tangdunte hi 101% zetin inthlanah hian hnehna an chang dawn tih a chiang,” a ti bawk.
Shekhawat pawhin chief minister hlui an thawhpui dawn thu hi a hranin Twitter-ah a tar lang a, inbiakna tum sarih an neih hman thu a sawi.
Kum 40 zet Congress-a a awm hnua a chhuahsan hma atang tawhin Amarinder Singh hian Punjab-ah hian BJP hi thawhpui turin a lo dawr tawh.
Prime Minister Narendra Modi-a sorkarin farm law a hnuh kir atang khan BJP hian Punjab-ah hian thawhpui tur an dap tan a. Rei tak an lo thawhpui tawh, Akali Dal nen farm law avangin an lo inthen tawh a ni.
Punjab hi kum thara inthlang tur an ni a, boruak a lian tawh hle a. Lo neitute tamna a ni a, Modi-a sorkarin farm law a hnuh kir hian awmzia a nei dawn em a hriat loh.