Typhoon chak takin Philippines chhim lam a nuaiah chawlh hmanna atana hman lar tak thliarkarte pawh a tichhe nasa hle tih thuneituten an sawi.
Super typhoon Rai hian chawlh hmanna thliarkar, Siargao chu Ningani khan thlipui darkar khata km 195 chuanga chak leh ruah tam tak nen a nuai.
Tropical storm hian thliarkara in awm, a kalkawnga mite chu a nuai chhe vek a, mi sang tel chenna in nei lovin an awm mek.
UN chuan mi maktaduai 13 velin Rai hi an tuar niin a sawi.
Mi 12 an thi nia hriat a ni tawh a, a dang pawh an awm la rin a ni.
Siargao-ah hian thingkungte a tlu a, power line tam tak a chhe bawk a. Tui a len bawk avangin mipuite chu hmun himah an insaseng nasa hle.
Thlawhna tumhmuna terminal pawh a chhia a, thlawhna tlankawng erawh tanpui hna thawktute thlawh luh leh chhuah nan then fai tawh a ni tih thuneitute chuan an sawi.
Rai hi khawthlang hawi zawnga kal zelin thliarkar lian zawk – Leyte, Bohol, leh Cebu te pawh a nuai a. Ruah a tam avangin luite chu an kuang atanga luang liamin a lian nasa hle.
Social media-a video thehdarhah chuan chenna in tam tak chu chhuahsan a ni a. Philippines-a khawpui lian ber pahnihna, Cebu-ah chuan in chhia a tam hle.
Khawthlang lama Siargao Island-a Surigao del Norte province-ah chuan Surigao khawpui Mayor Ernesto Matugas chuan Rai hnuhma chu ‘a nasa tak zet’ a ti.
“Engkim a tichhia a ni ber mai a. In chung a hawk a, lei min avangin kawngpui tlang a awm mang lo bawk,” tiin Philippine broadcaster ABS-CBN a hrilh.
Philippines ram hi kum tin thlipui na tak takin a nuai ziah a, kum khatah hian vawi 20 vel tal tawng ziah ang an ni.
Super typhoon Goni khan November, 2020 khan na taka nuaiin chhiatna an tawk nasa hle a. Goni hi kum 2013-a mi 6,000 chuang an thihna, Typhoon Haiyan hnua an tawn nat ber a ni.
Tun tuma thawk, Rai hi kumin chhunga an tawrhah chuan a chak ber tur nia sawi lawk a ni a. A hmain a kalkawng tur nia sawi lawka awm mi sang tel chu hmun himah an insuan chhuak lawk nghe nghe.