Beisei leh rinlawk ang ngeiin, ‘Dengi I Love’ film a che tha fal a, ‘Mizo Film Award 2021’ ah award pali ngawt a deng chhuak.
Tlau Entertainment buatsaih Mizo Film Award 2021 chu Inrinni zan khan Vanapa Hall-ah sem a ni a, mipui ngaihven Best Actor leh Best Actress-ah Papuia Pachuau leh Rosangpuii Ralte ten award an la a, Best Director chu Mapuia Chongthu a ni.
Dengi a Den!
Nomination puan a nih phat atang khan a elpui te lakah a den chho nghal viau a, a takah pawh a che tha . ‘Dengi I Love You’ star K. Vanlalawmpuia chu Best Supporting Actor atan thlan a ni a, Best Supporting Actress-ah a chanpui Melissa Lalmuansangi tho a ni. Kum naupangte niin, Mellisa hmabak a eng viau a, enzui a hlawh ngei dawn e.
He film hit zet maiin tun dinhmun a thlen theihna tur atana thawhhlawh tak, Ngaihawma Fanai chu Best Cinematographer-ah thlan a ni bawk. A phu! Award sem chhuah zana hlut hlawh ber thin Best Picture-ah ‘Dengi I Love You’ a ding chhuak bawk a, film hmuhnawm leh mit la tak tak zingah a dawk chhuak hian a larna a belhchhah a tih theih.
Da ‘Duo’
Papuia Pachuau leh Rosangpuii Ralte te kuta Best Actor leh Best Actress award a tlu lut hi mak i ti lovang. Mizo film-in bung thar a keu chhohna an thawhhlawk dun a, an thawhrimna leh inpekna hriatpui a, chawimawi an ni hi thil tihawm tak pawh a ni reng a ni. Mipa zawk hi ‘Hnehtu’ film-ah khan a changtupa ber a ni a. Thingtlang Tlangval, Scooty leh film dang eng emaw zatah a inlan tawh a, lemchan thiam kan neih that ber zinga mi a ni. Rosangpuii Ralte hi a hmel hmuh a nuam a, a chang thiam a, a hmei a pa in kan ngaihzawnrawn a ni ber.
Leitlang Rangkachak
Kum 2000 chho vel atanga kalphung pangngai pel a, huaisen taka bung thar keu a, Mizo film industry hmelthar min hmuhtirtu Mapuia Chongthu chu Best Director award hlan a ni a. ‘Nunna Thar’ film larzia leh hmuhnawmzia hre vektu kan ni. Sawi nawn a ngai awm love. A kut atang hian thil thar kan hmu ziah a, a ngaihtuahna atangin ‘idea’ thar a put chhuak thin bawk a, Mizo mipuite tan malsawmna hlu, leitlang rangkachak a ni chiang e! A kutchhuak dang ‘Last Wish’ chu Best Short Film atan thlan a ni bawk, hemi zana mimal anga langsar ber, a ni.
Huang rit leh hraw!
Phone, TV leh computer nei tawh phawt chuan en tuma kan phar buaina film, ‘Thingtlang Tlangval’ story ngaihnawmzet mai ziaktu Malsawma Lailung chu Best Screenwriter atan thlan a ni a, a elpui te an hraw hlawm dan atang hian he categroy boruak rihzia leh lenzia a hriat theih. B. Lalbiakvela (Damna Kim), H. Zosangliana (Nunna Thar) leh Nuna Hrahsel (Comrades) te hi Best Screenwriter dawng thei khawpa tha em em an ni vek mai!
Mizo Film Award ceremony hi dar 7:00-ah Red Carpet atangin tan a ni a, dar 8:00 atangin show hi LPS leh Zonet bakah, YK Official channel-ahte live-a pekchhuah niin, zaithiam pawh eng emaw zat an inlan a, Adama leh Sangtei Renza ten lawm an hlawh. Zorema Khiangte, Hlimhlimi, Arini, Kimkima leh Siampuii Ralte te an zai bawk.
MIZO FILM AWARD 2021 WINNER
• Best Actor – Papuia Pachuau (Hnehtu)
• Best Acctress – Rosangpuii Ralte (Thingtlang Tlangval)
• Best Supporting Actor – K. Vanlalawmpuia (Dengi I Love You)
• Best Supporting Actress – Melissa Lalmuansangi (Dengi I Love You)
• Best Director – Mapuia Chongthu (Nunna Thar)
• Best Cinematographer – Ngaihawma Fanai (Dengi I Love You)
• Best Screenwriter – Malsawma Lailung (Thingtlang Tlangval)
• Best Picture – Dengi I Love You!
• Best Short Film – Last Wish