NHM hnuaia thawkte ngaihsak an ngai
National Health Mission (NHM) a thawktuten lungawilohna an lantir avangin office an kai lo a, hemi vang hian kartawp khan damdawi in lam kaihhnawih tam takin an harsatna an tawh phah a ni.
Sorkar in engtinnge a chhan let ang a, hma a lakpui dawn a hriat loh a, health minister ber a zin avangin engtin zel nge NHM thawktu lam hi an kal dawn a hriat loh bawk. Thudawn a nih danin health minister hian a awm loh avangin I&PR minister chu NHM lam hotute be turin a ti a, mah se an thu a la inman fuh hlei thei lo thung a, inbiakna an neih awm hriat a la ni lo bawk.
National Health Mission Employees Union (NEUM) hruaitute chuan sorkara an thil phut hrang hrang chungchangah chhanna an hmuh loh avangin an member-te chuan lungawi lohna lantirin an hnathawhna hmunah an kal lo tih an sawi a, mi 2,200 niin, Mizoram chhunga sorkar enkawl damdawi in hrang hranga thawkte an ni hlawm a ni. Lungawi lohna hi an kalpui zel a nih chuan a nghawng tur hi a na chho telh telh dawn a, sorkar pawh hian inbiakna felfai leh sawnsawhlawt zawk a ngaihtuahpui ngei a tul awm e.
An thil phut hrang hrangte hi a hlawhtling nghal vek thei lo a nih pawhin mipui harsatna siam zawnga khawsa reng lo tura ruahmanna an siampui thuai pawh a tul a; thawktu lam sawi danin sorkara an thil phut hrang hrangte chhanna chu tun thla ni 15 thleng an ngaichang a, thu lawmawm an hmuh loh avangin nawrh an huaihawt ta a ni a, sorkar hi a ngawi rei mah mah nge, a changtu minister in a ngaihthah tih pawh hi ngaihtuah tham tak chu a ni.
Engpawhnise, harsatna siam lo zawnga kal dan hi ngaihtuah rang se la, a tul a nih chuan a tu ve ve pawh inphahhnuai hreh lo se, mipui tana thawk an ni tih i hre reng bawk teh se.