Kerala-a Alappuzha district-ah BJP hruaitu chu Pathianni khan mitute nge an nih hriat lohvin an that a. A hma ni chiahah he district-ah tho hian Social Democratic Party of India (SDPI) hruaitu thah a ni tawh bawk a. Darkar 12 dan leka politics hruaitu pahnih thah hian boruak a siam hle.
Tualthahna pahnih a thlen hnuah hian Alappuzha district pumah CrPC Section 144 puan zui a ni.
Thi hi BJP hruaitu, OBC Morcha secretary Renjith Sreenivasan a ni a. Pathianni tuk khan a chenna inah mi tute emaw lutin an that a ni.
Inrinni khan SDPI hruaitu, Kerala-a an secretary KS Shan chu tunge a nih hriat lohvin Alappuzha district-ah tho hian a that nia hriat a ni.
Shan-a hi an chenna ina a haw lam a car-a a chuang chu bike-a na taka sut a ni a. Hliam hmun 40 chuangah neiin Government Medical College Hospital, Kochi-ah dah a ni a, Pathianni tuk khan a thi a ni.
SDPI President MK Faizi chuan Shan-a hi Rashtriya Swayamsevak Sangh (RSS) member-ten an that niin a sawi.
Kerala Chief Minister Pinarayi Vijayan chuan Alappuzha-a tualthahna thleng a dem thu a sawi a. Police-in ngawrh taka chhuiin a titute an man chhuah ngei tur thu a sawi bawk.
“Hetianga mawl tak leh mi lainat lo taka chetna hian ram a tichhia a. Hetianga mi thattu leh mi hawtute hi tute nge an nih hre chhuakin khawtlang atanga paih chhuah tur an ni,” a ti bawk.