Myanmar atanga Mizoram kaltlanga kuhva rah ro tawlh khapna thupek tichhuaktu, Champhai Bawrhsap-in a man kuhva rah truck trip sarih, Rs nuai 42 man hu chu Kelkang daiah hal a ni. Champhai bawrhsap hian dan lova kuhva hmanga sumdawn leh phurh khapna thupek hi a lo chhah tawh.
The Zozam Times thudawn danin, December 18, 2021 zan dar 8 pelh hnu khan Champhai bawrhsap leh sorkar official pawimawhte, Farkawn tlangdunga an zin haw lamin Champhai atanga km 19 vel, Kelkang daiah dan lova kuhva phur rutu lirthei pakua an tiding a, chung zinga lirthei pathum, hnam dang khalhte chu an tlanchhia a, Mizo khalh lirthei pasarih chu man a ni.
Kuhva ro phur hnam dang khalh lirthei pathum tlanchhiate hi Champhai bawrhsap leh a hote chuan an um zui a, helai bawr vela police checkgate-a duty-te chu lirthei tlanchhiate an hmuh leh hmuh loh an zawt a, police erawhin an pute thu hmu lo chuan eng thu mah an hrilh thei lo thuin bawrhsap leh a hote hi an lo chhang niin thudawn a ni.
Kelkang daia dan loa kuhva rah phurh truck trip sarih hi Inrinni zan khan hal a ni a, kuhva rah haltute hi hriat an ni lo.
Champhai bawrhsap leh a hoten an man kuhva phurte tax invoice atanga a lan dan chuan heng truck-te hian kuhva bag 180 an phur a, kuhva rate hi kg. khat Rs 20 angin an sawi a, open market-ah hian Vairengteah kg.1 Rs 295 vel a niin bungraw hlut zawng, Rs Nuai 42 vel nia ngaih a nih laiin tax invoice-ah chuan Rs Nuai 3 vel man chauh angin tar lan a ni a, Mizorama chhiah lut tur awm chu Rs 7,200 chauh a ni ta a ni.
Hemi chungchangah hian Lalhruaitluangi d/o H.Thangrila, Aizawl Chaltlang Lily veng nia inchhal chuan Champhai PS-ah FIR thehlutin a truck pali, kuhva quintal 120 vel phurtute chu Champhai bawrhsapin mansakin hal ral a nih thu thlenin, bawrhsap chungah a tul anga action la turin a ngen a ni.
Lalhruaitluangi chuan a FIR thehluhah chuan Kelkang khaw daiah a lirthei pali, kuhva phur chu Champhai Bawrhsap Maria CT Zuali’n lo manin, a driver-te mobile phone leh lirthei chahbi a lak sak tih ziak langin, hetianga a neitute hriat loh leh kuhva, foreign origin a nih leh nih loh pawh enfiah hmasa lova lo haltu leh mobile phone leh motor chahbi lo chhuhsak ngawttu chungah hian dan anga hma laksak turin police a ngen tih a tar lang.
Kuhva rah hal chungchanga FIR thehluh hi police hotu lianten bawhzui tura an tih angin Champhai SP leh a hote chuan an bawhzui nghal niin thudawn a ni a, nimin khan SP leh a hote chu kuhva ro manna hmunah hian an kal nghal a. Hetianga FIR an bawhzui lai hian dan phal loh phur nia rin hnam dang khalh lirthei pathum, bawrhsapin lo ngaihven tura a tih erawh police-te hian an umzui lo a, an ngaihven lo nia thudawn a ni.
Chief Minister Zoramthanga hova khawchhak atanga dan lova sumdawnna kal mek tihtawp dan tur official-ten an rel hnu lawk, December 14 zan atang khan Champhai atangin kuhva rah ro chu hmun danga kalpui turin kawngpui pangngaiah phurh a ni.
Ni dangah chuan sumdawngte hian kuhva rah ro hi kawngpui pangngaiah kal tir lovin an hel thin a, December 14 zan atang khan kawngpui pangngaiah kalin ni khatah truck trip 25 zel kalin December 16 atangin trip 30 kaltir thin a ni ta a. Kuhva rah ro Champhaia phurh luh leh Champhai atanga phurh chhuah hi Customs Preventive Force leh Assam Rifles ten an vil ber a ni.
Dan phal loa kuhva rah tawlh chungchangah hian ministry of home affairs chuan kum 2019 khan Mizoram chief secretary chu lehkha thawnin he thil hi titawp turin a lo hrilh tawh a ni.
Hetiang a nih mek lai hian Mizoram Agriculture Marketing Corporation chuan dan loa kuhva tawlhtu (smuggler)-te hnenah hian kuhvate chu Mizoram thar chhuah ngei a ni (certificate of origin) tih lehkha an pe chhuak reng bawk.
Mi tam tak chuan heti tak maia kuhva smuggling sorkarin a tuipui lui hi sorkar thuneitute zingah a hlawkna tel ve an awm ni ngeiin an sawi.
///////////////////