Krismas bazar a lun tan, sumdawngten inhralh harsa an ti thung

Kristiante hunpui, Krismas chu kar khat chauhin a dang tawh a, Aizawl Bazar lun chho viau tawh mah se kum dang a phak lo a; sumdawngten an inhralh hlei thei lo.
Hri len hma kha chuan December 15 hnu lamah chuan Aizawl Bazar a lun a, sumdawngte pawh an inhralh tha hle thin a. New Market huam chhunga sumdawngte chuan kum dang an phak lo nasa dawn tih leh inhralh a har thu The Zozam Times an hrilh.
Aizawl New Market leh Millenium Centre tlawh kualtu, The Zozam Times-in thawmhnaw dawr hrang hrang neitute a kawm kual a, thawmhnaw zuarte chuan tun ang hunah chuan ni khatah Rs nuai khat chuang an thil zawrh an hralh tawh thin tihte, tunah erawh ni khatah sing hnih man vel pawh an inhralh lo tih an sawi.
New Market huam chhunga dawrkaite chuan nikum ai chuan mipui an tam zawk tih an sawi a, “Mipui vei vak tam mah se sum lengvak a tlem,” an ti.
Aizawl New Market enkawltu, Commerce & Industries deptt hnuaia Commerce wing hotute chuan, hri len hma aiin mipuite chu tlem deuh mah se nikum ai chuan an tam zawk tih an sawi.
Hetihlai hian hri len hma kha chuan tun ang hun Krismas dawn hnai tawh takah hian bazar chhung chu kal ngaihna awm mang lo khawpin mi an innek buai tawh thin tih sawiin, kuminah erawh bazar chhung kal harsa khawpa innek buaina a la awm lo tih an sawi.
Commerce wing hotute chuan pawisa bo leh naupang, a hruaitute nena inhloh report pawh a tam tawh tih an sawi a, hri len hmaa thil bo report awm thin zat erawh a pha lo hle.
Mizoramah chuan December chawlhkar hnih vel atang bazar a lun thin a, mi tam takin Krismas bazar hi mamawh lei nan leh hunpui a nih avangin mamawh lem loh pawh intihhlim nan an lei thin a, Covid-19 hri a len hnuah erawh Krismas bazar a awm mumal thei lova, nikum aiin kuminah erawh bazar a lun deuh thung.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427