Lok Sabha chuan Election Laws (Amendment) Bill 2021 chu rorelna ina duh lohna leh duh loh avanga au buaina nasa tak karah Thawhtanni khan a pass.
Bill hi dan anga hman a nih chuan Aadhar number leh electoral roll chu thlun zawm a ni tawh dawn a. Miin kum 18 a tlin chuan kum khat chhungin vote nei tura inziah luh theihna remchang vawi li a nei thei tawh bawk ang.
Sawihona huna zawhna chhangin Union Law & Justice Minister Kiren Rijiju chuan he bill thar, a awm hmasa siam thaa tihdang (amend) chuan inthlan fel fai leh thianghlim zawk a siam dawn tih a sawi a. “Aadhar number leh electoral roll thlun zawm hi tih ngei ngei tur emaw, tih tur emaw a ni lo va, mahni duhthu a ni ang,” a ti.
Eptuten he bill hmanga inthlana remchanna awm thei hrang hrang an sawite sawi fiahin minister chuan Election Commission of India leh Parliamentary Standing Committee pawhin tha an tih anga siam leh tihdanglam a ni zawk tih a sawi a. “Sorkar pawhin ECI leh state hrang hrangte a lo sawipui tawh hlawm a ni,” a ti bawk.
Bill a pharhnaah Rijiju chuan tun hma ang lovin, miin kum khat chhungin vawi li vote nei tura inziak luh theih hun a nei tawh dawn tih a sawi a. Hengte hi January, April, July leh October 1-ah zel a ni dawn tih a sawi bawk.
Bill pass a nih hnua parliament tuala thuthar lakhawmtuten an kawmnaah Minister Rijiju chuan an bill pass tak chuan ram chhunga inthlanna kaihhnawihah siam thatna lian tak a tawng niin a sawi.
Inthlan kaihhnawih dan pharh a nih hian Congress hruaitu Adhir Rajan Chowdhury, AIMIM hruaitu Asaduddin Owaisi, Trinamool Congress hruaitu Kalyan Banerjee, RSP hruaitu NK Premchandranleh BSP MP Ritesh Pandey te chuan an duh loh thu an sawi hlawm.
Eptute hian hetiang bill pawimawh lutuk hi sorkarin hmanhmawh taka pharhin pass turin a chhawp chhuak niin an sawi a. A chhunga thu awmte pawh sawihona hun thawl, zir chianna hun a awm lo niin an sawi hlawm a ni.