National Health Mission Employees Union (NEUM)-in Mizoram sorkar laka lungawi lohna lantira nawrh an kalpui chu nimin zing atang khan an titawp a; nawrh an tihtawp avang hian an lungawi ta vek tihna a nih loh thu an sawi.
Nimin khan NEUM hian nawrh an tihtawp thu hi thuchhuah siamin an tar lang a. Health Minister Dr R Lalthangliana leh Health Secretary R Lalramnghaka ten sorkar laka an thil ngiat hrang hrang – regularisation chungchang te, hlawh regular taka lak chungchang te, medical reimbursement changchang te, transfer TA chungchang bakah health department hna lak turah pawh NHM hnuaia thawk mekte tana hamthatna ngaihtuah tura an intiamnate rintlak tura an ngaih avangin, tiam chin awm loa nawrh an huaihawt chu an titawp rih niin an sawi.
NEUM hian sorkar laka an nawrhna tihtawp avang hian an lungawi ta vek tihna a nih loh thu sawiin, “Kan sorkar hotute an intiam anga an hmalakna hmuh tur a awm lo a niha cabinet meeting-in min ngaihtuah vat a nih loh chuan a chhe ber pawh lo thleng a, harsatna lian zawk a thleng palh a nih pawhin sorkar cho chhuahah kan ngai ang,” an ti.
An nawrh chhunga damlo tam takten harsatna an tawh avangin NEUM chuan mipuite chungah ngaihdam an dil nghal bawk a ni.