December 17, 2021 zan khan Serchhip police-te chuan Thenzawl daiah tualchhung siam zu tam tham tak manin, a kawltu leh an phurhna lirtheite an man nghal bawk.
Thudawn danin Serchhip Police te hian Zirtawpni khan hmun hnihah lirthei enfiah hna hi thawkin, zan dar 11:30 velah Chalkhan-ah Scorpio car (Mz-03-2425) atangin zu an man a. Zu man hi rambo polythene-a dah niin, a vaiin litre 290 a ni a, litre 10 zelin fun 29-a dah hran a ni.
Heng zu rawn phurtu, Laltanpuia (32), Chanmari West, Aizawl, tuna Phunchawng-a khawsa mek nia insawi leh a kalpui, Rohit Chakma (19), Marpara South, tuna Phunchawng-a khawsa mek nia insawite chu manin thubuai siamsak nghal an ni.
Zute hi Phunchawng atanga phurh nia sawiin, Thenzawl-a dah tur niin an sawi a. Serchhip Police te chuan thubuai ziak lutin Inrinni khan Serchhip District Court-a hruai an nih hnuah Jail-ah thawn nghal an ni.
Heng zute hi fun khat Rs 1,000 man zel niin, a vaiin Rs 29,000 man vel nia chhut a ni.
SP, Aizawl hmalaknain Rangvamual chhehvela zu leh a siamna kaihhnawih bungrua tam tak tihchhiat a ni tawh.
December 13-17, 2021 inkar khan Aizawl khawpui chhunga Police Station hrang hrang leh District Special Branch te’n Rangvamual chhehvela zu leh a siamna kaihhnawih tihchhah runpui (special operation) neih a ni. He mi hun chhung hian zu siamna factory 61, zu bilh lai zem 160, zu siamna bungbel set 28 bakah zu siam nana hman tur meihawl bag engemawzat, buhfai leh chini, avaia hlut zawng Rs 39,41,100 man hu zet tih chhiat a ni.