Myanmar hruaitu paih thlak tak, Aung San Suu Kyi-i thubuaia thu remna puan hun chu sawn hlat a ni tih an thubuai hretu pakhat chuan a sawi.
Sipaiten ro an relna rama court chuan Suu Kyi-i’n phalna nei lova walkie-talkie leh signal jammer set a lo kawl nia an puhna thubuai thu remna hi Thawhtannia puan turin an ti a. He thubuaiah hian thiam loh a chang a nih chuan kum thum thleng lung in a tang thei dawn a ni.
Reuters leh AFP news agency-ten he mi chungchanga mi an biak chuan a hun sawn a nih thu a sawi a, judge-in a sawn chhan hi hriat a ni lo thung.
Thubuai hi a chhan hriat si lohvin December 27 thleng atan sawn hlan a ni tih AFP a hrilh.
Kum 76 mi ni tawh, Suu Kyi-i hi December 6 khan an rama coronavirus a darh lohna tura dan zam a bawhchhiat avangin kum li tang tura hrem a lo ni tawh a. A hnuah kum hnih chhung tia pawh tawi leh a ni a, tunah hian a hmun hriat lohvah pawn chhuak thei lova hren mek a ni.
An khawpui, Naypyidaw-a a chungchang relnaah hian chanchinbumite luh phal an ni lo va, a dan hre mite chu chanchinbumite an biak phalsak an ni lo bawk.
Myanmar ram hi February 1-a sipaiten Suu Kyi-i kaihhruaina hnuaia mipui rorelna ram an nih chu chhuhsakin hemi hnu lamah hian buaina a tam hle a. Ram mipuiin sipaite chet dan duh lohna chu nasa taka lantirin khawvel ram hrang hrangin sipaite chet dan an dem a. An ram hruaitute an mante pawh chhuah turin an ti nasa hle hlawm.
Sipaite hian sorkar paih thlaa thuneihna an chan ruala an hren hnuah tun thlengin Suu Kyi-i awmna hi an la sawi lo va. Sipai sorkar hun hmasaah pawh khan hun rei tak pawn chhuak thei lova hren a lo ni tawh.
An ram mipuiten sipai sorkar duh loh an lantirna chu sipaiten an chhang let nasa hle a. Pawl pakhatin a chhinchhiahnaah chuan mi 1,300 chuang an thi tawh a, mi 11,000 chuang man an ni tawh bawk.