DoNER ministry consultative committee thutkhawm vawiina Delhi-a neihah Lok Sabha MP C Lalrosanga’n Lawngtlai district-a Hmawngbuchhuah thleng relkawng siamna tura survey neih tawh anga hmalak zui a tul thu a sawi.
C Lalrosanga chuan kilometre 223-a thui ni tura chhut Sairang atanga Hmawngbuchhuah thlenga relkawng siam tum chu Kolodyne multi modal transit transport project nena inzawm zel tura ruahman a nih thu sawiin, hei hi Mizoram tan a tangkai theih hle dawn tih a sawi a. Hma la chhunzawm ngei turin DoNER hotute chu ngen a ni.
Mizorama khualzin hip luhna tur ruangam tihchangtlun zel a tul thu leh mau hman tangkaina dap zui zel a tul thu pawh C Lalrosanga chuan DoNER hotute chu hrilhin, hmarchhak state-te tana central sorkar ministry leh department 54-te sum ruahman zaa 10, gross budgetary support atana Rs. vaibelchhe 68,000 chuang tun sorkar kuma ruahman a ni chu lawmawm a tih thu sawi.
DoNER minister G Kishan Reddy chuan Prime Minister thahnemngaihnain India hmarchhakah relkawng siamna Rs. vaibelchhe 39,000 senna tur hna hrang hrang thawh mek a nih thu a sawi a. Relkawng tur leiverh 122 verh mekah 27 verh zawh tawh a nih thu a sawi. Motor kawngpui laih hna Rs. vaibelchhe 85, 000 chuang senna tur hmarchhakah thawh mek a nih thu a sawi bawk.