State-level expert team on COVID19 management(SLETOCOM)-in COVID19 chi thar Omicron hmuhchhuah a nih hnua India ram pawn atanga Mizorama haw zinga mi 2 Lengpui airport-a RAgT positive te swab sample chu genomic sequencing tura Kolkata-a thawn a nih thu leh tun karah result hriat theih an beisei thu an sawi.
SLETOCOM chuan Omicron hmuhchhuah a nih hnuah India ram pawn atanga Mizorama haw mi 139 an awm tawh thu sawiin, an zinga pahnih RAgT positive te chu ZMC, Falkawna enkawl an nih thu leh ngaihtuahawm an nih loh thu an sawi a. Heng mi te hi Singapore leh Australia atanga lo haw an nih thu an sawi bawk.
IDSP Nodal officer Dr Pachuau Lalmalsawma’n Mizoramah tun thla (December) ni 1–21 inkarah chawhrualin nitin COVID19 kai hmuhchhuah 197 awm ang an nih thu a sawi a. Tun thla vek ni 13–19 inkara positivity rate 7,2% a nih thu leh WHO inkaihhruaina siamah chuan positivity rate 5% aia a hniam hma chu hripui leng thunun tawh anga ngaih theih a nih loh thu a sawi.
Health minister Dr R Lalthangliana hova vawiina COVID19 hri leng chungchang thlirhonaa tarlan a nih danin, Mizoramah COVID care centre (CCC) 23, khum 1476 awm theihna a awm mek a, Community COVID care centre (4C) 88, khum 2628 awm theihna awmin, Dedicated COVID health centre (DCHC) 20, khum 332 leh ICU 2 awmna leh Dedicated COVID hospital (DCH) khum 306 leh ICU khum 48 awmna a awm mek bawk.