Mizoram chhunga kawngpui sial mektu, NHIDCL hotuten kawng sial hna chak taka an thawh theih nan, harsatna an tawhte a rang thei ang bera chin fel thuai a tul thu Mizoram Larsap Hari Babu Kambhampati an hrilh.
National Highways Infrastructure Development Corporation Limited (NHIDCL) Executive Director Virendra Kumar Jakhar chuan nimin khan Raj Bhavan-ah larsap kawmin hna an thawh leh an buaipui mek, Aizawl to Tuipang Road, Aizawl to Champhai Road, Sairang to Vairengte, 4-Lane Road leh Aizawl By-Pass Road te dinhmun leh hna an thawh chin te a hrilh.
NHIDCL executive director chuan kawng an sialna mek, hmun thenkhatah harsatna an neih thu sawiin, an harsatna tawhte chu a rang thei ang bera chin fel thuai a tul thu leh heng kawngte hi Mizoram hmasawnna atana a pawimawh dante chu larsap a hrilh.
Larsap chuan heng harsatnate chin fel vat a nih theih nan state sorkarin a tul anga lo ena hmalak dan tur thuneitute sawipui a tum tih NHIDCL hotupa hi a lo hrilh.
NHIDCL-in an tar lan danin Mizoram chhung, National Highway kilometre 784-a thui enkawl, chei that leh sial mek an nei a, heng zingah hian Aizawl to Tuipang Road, km. 397-a thui te, Seling to Dulte Road, km. 69-a thui te, Dulte to Champhai Road km. 68-a thui te laih zauh hna an kalpui mek a ni.
Keifang – Tuivai Road, km 84-a thui leh Sairang – Vairengte, km 91-a thui, sial leh laih zauh hna pawh tan vat an beisei.
Aizawl hel tur kawngpui, Aizawl By-Pass, km 39-a thui chu ruahmanna a kal mek thu leh hei hi National Highway-ah erawh puan a la nih loh thu NHIDCL hotupa chuan larsap a hrilh.