Home Minister Lalchamliana’n vawiin khan mipui hnena thuchah tichhuakin Mizoram mipuite Krismas leh Kumthar lo thleng tur Chibai a buk.
Home minister chuan hri leng avangin kumdang anga ropuiin Lal thar piang chibai buk theih ni dawn lo mahse, “Kan thinlung erawh in buatsaih thar theuh ang u, a ti.
“Mizoram sorkarin Krismas leh kumthar vuakvetah zu leh ruihhlo chi hrang hrang, halpuah leh halmawi lam chi, sky lantern leh naupang silai lem, a mu nei chi te chu mihring hriselna atan leh kan chhehvel boruak tan pawha tha lo, chhiatna dang thlen thei an nih avangin a khap a, kan tawn chinah chuan mipui pawhin kan zawm tha niin a lang a, kan hmabak hun tlem te la awmah hian uar takin Mizoram mipuite thlawpna ka ngen a ni”, Home minister chuan a ti a. Hunpui atana venhimna hnathawktu police, fire & emergency service duty, YMA, YLA, MTP, YCA leh khawtlang mitlawmngai duty te duhsakna hlanin, “Mipuite pawhin kan himna atana duty te hi i thlawp tha zel ang u, a ti.
Home minister chuan “COVID19 avanga kan buaina te a la reh loh avangin hri laka kan himna tura sorkarin inkaihhruaina a siam leh hri leng laka himna tura fimkhurna tur hrang hrang te te ngaipawimawh turin mitin te ka ngen” a ti a. “Kumtluana hah leh rim taka COVID19 kaihhnawih hna thawktu Health department-a thawktute, LLTF, VLTF leh tlawmngaia inpe te zawng zawng chungah lawmthu sawiin Chibai ka buk a ni” a ti.
“Kan state ramri buaina avanga mahni inlum thlahlel thei lova venhim hna leh ram humhalhna hna hrang hrang thawka penchhuakte Krismas leh Kumthar Chibai ka buk a che u” tiin, “Police te chauh ni lovin pawl hrang hrang leh mimal tam takin thilpek leh mahni penchhuakin ram hmangaihna in lantir a, in inpekna avanga kan thlen chin zelah hian Mizoram mipui ten kan fak takmeuh che u a ni” a ti.
Home minister chuan “A tawp berah chuan kan hunpui Krismas leh Kumthar hi hlim leh lawm taka hmang theuh turin Mizoram mipuite duhsakna ka hlan che u a; kan hlimna leh lawmna hian kan chhehvel ami te thleng pha theuh sela. Thenawm khawveng nen inremin, mahni chhungkua theuhah hlim takin hmang ila; Dikna ngai pawimawh ila, kan Lalpa pianchamah hian Pathian khawngaihna in chungah lo thleng theuh rawh se,” a ti bawk.