Tripura leh Mizoram inrina Zampui tlangdunga Phuldungsei khua chu Mizoram sorkarin VC pein, vawiin khan Mizoram sorkara minister of state Robert Romawia Royte hovin VC thar hi an lawm.
Robert Romawia Royte chuan Phuldungsei khuaah hian Multi sports centre (Futsal ground, basketball court, volleyball court leh thil dang awm theihna sakna tur lungphum a phum nghal a. He project bultanna tur Rs nuai 130 atanga a zatve chu sorkar laipuiin a release tawh a nia thudawn a ni.
Tripura state civil service officer pakhat chuan Mizoram sorkarin Phuldungsei khua VC a pe chu thil mak lutuk a nih loh thu The Zozam Times a hrilh a. Phuldungsei khua chu kawngpuiin a tantlang, a chhuahlam Mizoram, a tlaklam Tripura a nih thu leh Tripura sorkarin Tripura huam chinah hma a lak laiin, Mizoram sorkarin a chan lam chinah hma a la ve ni maia a ngaih thu a sawi.
Thudawnna pakhat chuan Phuldungsei khua hi ramria awm a nih thu leh Tripura lam chan a tlaklam chu Tripura sorkarin a ngaihsak viau laiin a chhuahlam Mizoram lam chan chu a ngaihthah deuh niin a sawi a. Mizoram sorkarin VC a pe ta chu chuan state pahnih inkarah harsatna lian a thlen a rin loh thu The Zozam Times a hrilh bawk.