Champhai bawrhsap/district magistrate Maria CT Zuali laka Champhai Police Station-a FIR thehluh chungchangah Mizoram Civil Service Association (MCSA)-in thuchhuah siamin, he thil hi democratic institution/district administration leh civil service tihzahawmlohna leh hnuaichhiah tumna ni thei hiala an ngaih thu an tarlang.
MCSA chuan Champhai bawrhsap laka FIR thehluh chu tihtawp thuai a nih an beisei thu sawiin, titawp lova kalpui zel a nih chuan kalpui a nih dan ngun taka an thlirzui tur thu an sawi a. “Ram dan hnuaia mipuite himna emaw mipui hmangaia district magistrate-in thupek (order a chhuah reng reng te bawhzuitu tur district level-a law enforcement agency ten theihtawp chhuahin bawhzui thin sela, thupek dang ngaichang lovin an hotu lu ber district magistrate thu leh hla ngaichang tawh thin se, tih hi MCSA duhdan a ni” an ti bawk.
Indian Administrative system-ah district-a thuneitu sangber, sorkar kut leh ke, mit leh beng, dan leh thupek kengkawhtute hotu lu ber leh dan hnuaia thupek pawh siam thintu chu District bawrhsap/district magistrate a nih thu MCSA thuchhuah chuan a tarlang a. Champhai bawrhsapin central leh state sorkar thupek pawimawh tak tihhlawhtling tura a hmalakna kaihhnawiha tu ten emaw a laka FIR an thehlut leh rang taka case register a ni chu thil thleng khat tak, democratic institution/district administration leh civil service tihzahawmlohna leh hnuaichhiah tumna ni thei hiala an ngaih thu an sawi a ni.
Samthang khawtlang VC leh NGO ṭhukhawm pawhin Champhai bawrhsap Maria CT Zualin’n dan lova Kuhva tawlh dova a hmalakna chu an thlawp thu thuchhuah siamin an tarlang a. Myanmar aṭanga Mizorama dan lova Kuhva phurhluh te chu Samthang ram paltlang an rem tih loh thu an sawi.
Dan lova sumdawngtuin dan anga hmalatu Champhai bawrhsap Maria CT Zuali laka FIR a thehlut ngam chu an dem thu sawiin, Champhai bawrhsap lama an ṭan tlat thu an sawi bawk.
Mission Veng branch YMA pawhin Champhai bawrhsap Maria CT Zuali chu an member a nih thu leh dan lova thil ti te dova a hmalaknaa an thlawp thu thuchhuah siamin an tarlang a. Dan lova thil ti te avanga harsatna a tawk chu mak an tih thu leh a laka FIR thehluttu an dem thu an sawi bawk a ni.