Tourist Lodge, Zotlang, Lungleia RT-PCR Laboratory chu vawiin khan health minister Dr R Lalthangliana’n a hawng a. Vawiin vek khan Lunglei Civil Hospital-ah COVID19 kai te enkawlna tur Dedicated Covid Health Centre (DCHC) a hawng bawk.
Lunglei Civil Hospital-a DCHC hi tun thla ni 20 khan luah tan niin, khum 28 a awm a, DCHC khum 20, High Dependency Unit (HDU) khum 4 leh ICU khum 4 te an ni.
Health minister chuan COVID19 do kawngah sorkar department hrang hrang, kohhran, tlawmngai pawl, khawtlang hruaitute leh Mizoram mipuite tanrualna chhunzawm zel zel a tula tih a sawi a. COVID hri thar Omicron laka inveng turin Mizoram mipui ten hri leng laka himna tura sorkar ruahmannate zawm that zel a tul thu a sawi.
Vawiin vek khan Health minister chuan Baptist kohhranin an buatsaih COVID19 kai te enkawlna BCCC leh Christian Hospital Serkawn-a hman atan Rs. 30,000 a hlan a. Civil Hospital Lunglei, John Williams Hospital, Hnahthial District Hospital, Hope Hospital, Faith Hospital, Haulawng PHC, Tawipui PHC leh Lungsen PHC-te hnenah kumthar chibai bukna sum a hlan bawk.