Health Minister Dr R Lalthangliana hovin Health department hotute ten nimin khan Mizorama hri leng dinhmun an thlirhova. Covid chi thar ‘Omicron’ lo thleng thei avanga lo inbuatsaihlawk dan tur te an sawiho.
Health Minister hova Health department hotute thukhawm hian contact tracing uluk leh nasa zawka kalpui chungchangte, containment zone puan chungchangte, central sorkar atanga Omicron hmachhawn dan tur chungchanga hriattirna leh inkaihhruaina lo kal chungchangte, sample test nasa zawka kalpui leh dan tur te, sub-centre tina RAgT kit dah tura ruahmanna siam chungchang te an sawihop tih sorkar thuchhuah chuan a tarlang a. An thusawihoah te eng thutlukna nge an neih tih erawh a tarlang tel lo thung.
Health minister hova thukhawm chuan thawktu lama harsatna awm thei te pawh sawiin, a rang lama chinfel dan kawng dap tum a nih thu sorkar thuchhuah chuan a tarlang a. World Bank, NITI Aayog leh ministry of health & family welfare-in kumtin an tihchhuah thin ‘healthy states, progressive India, reports on the ranks of states and union territories, health index round IV 2019-2020’ 2021 kumtawpa tihchhuahah state te zingah Mizoram chu pakhatna a nih thu leh Mizoram chu ram pum state te zingah overall leh incremental-ah pakhatna ve ve a nih thu an tarlang.
Universal health coverage day 2021 denchhena consultation workshop December ni 13, 2021 a New Delhi-ah neihah ‘Azaadi ka Amrit Mahotsav campaign’ neih meka India rama state hrang hrang ti thate lawmman semah pawh Mizoramin India ram states hrang hrang zinga ‘Wellness activities’ ah lawmman pathumna a lah thu sorkar thuchhuah chuan a tarlang a, Northeast atanga lawmman la thei awmchhun a nih thu a tarlang bawk.
Health minister chuan heng hmalakna hrang hranga Mizoramin a titha chu thil lawmawm a nih thu a sawi a. Thawktu zawng zawng inpekna leh thawhhona vang a nih thu leh theihtawp chhuah zel a tul thu a sawi bawk a ni.