Indian Super League champion Mumbai City FC lakah Jerry Mawihmingthanga’n a football thiam a pholang a. A goal hnih khung leh midang khung tur vawikhat a siamsak zarah Odisha FC in 4-2 in Mumbai City FC an lehthal.
Tilak Maidan Stadium-ah a zawna match li chak hmel hmu tawh lo Odisha FC in second half ‘comeback’ pui tak an tihlawhtling a. A bul tumtu chu Mizo winger Jerry-a a ni.
Aridai Suarez hmangin Odisha FC in minute 4-naah goal an khung a, duhthusam in bul an tan. Mahse Islanders tan Ahmed Jahouh leh Igor Angulo ten first half-ah goal an khung a. Halftime-ah Mumbai in hma an hruai.
Second half-ah erawh Odisha tan Jerry-a a inlar a, tunhnaia an tlarhnung lama ngheh lohna nei leh thin Mumbai City lakah Odisha an hlauhawm telh telh. Sahil Panwar-a’n tauh luh ngei tur a thelh hnuah minute 70-naah Jerry-a’n a huntha neih a tauh sual ve lova, Nandhakumar ball cross chu kawh zetin a tauh lut.
Minute sarih hnuah dinglam kil atangin Jerry bawkin an hmahruaina goal a khung a, an goal thumna chiang taka hlap lutin an hnehna tichiang turin Jonathas chuan goal li na a khung leh a, Brazilian goal khung tur siamsaktu chu Jerry bawk a ni.
Odisha FC assistant coach Kino Sanchez chuan Jerry-a chu fakin, “Thinlung takin Jerry hi staff leh player-ten kan lawmpui. Pre-season atang tawhin rim takin a thawk a, hetianga chetthat hi a phu tak zet a ni.”
“A inkhelh apiangin theihtawp a chhuah ziah a, nidangah tlarhnung a pui a ngaih nasat avangin a langsar thei lova, vawiinah erawh lehlam lehlamah team tana a tangkaizia chiang takin hmuh tur a awm.” tiin a sawi.