Krismas-kum thar vuakvetah khapna bawhchhia thubuai 23 ziah lut


Krismas leh kum thar vuakveta halpuah hal, kawl leh zawrh khapna thupek bawhchhiat avanga thubuai 23 ziah luh a ni.
Aizawl Bawrhsap Dr Lalhriatzuali Ralte-in mipui him tlanna atan leh boruak a lo thianghlim theih nan nikum October leh December thla khan Krismas leh kum thar vuakvetah halpuah hal, kawl leh zawrh khapna thupek a tichhuak a. He khapna thupek bawhchhiatna avangin thubuai ziah luh hi 23 a ni. Heng zingah thubuai ziah luh 16-te hi halpuah kawl/zawrh vang a ni a, halpuah hal avanga thubuai ziahluh hi pasarih a ni thung.
Halpuah kawl/zawrh leh hal khapna thupek bawhchhiaa man a, thubuai siamsakte hi mi 26 niin, heng zinga mi 19-te chu halpuah an kawl/zawrh vanga case siamsak an ni a, mi pasarihte hi halpuah hal avanga case siamsak an ni a. Hetih lai hian, halpuah man zawng zawng belhkhawmin Rs 2,00,375 hu a tling a ni.
He khapna thupek bawhchhetu an man a, thubuai siamsakte hi IPC 188 hnuaiah an chungchang hi ngaihtuah tur a ni a. Thiam loh chantir an nih chuan lung in tantir emaw, pawisa chawitir emawa hrem tur an ni.
Hetih lai hian, Aizawl police hotute chuan hunpui vuakvetah dan leh thupek kenkawh kawngah harsatna an tawh loh thu leh, dan bawhchhiatna avanga buaina lian tham awm loin, boruak a muanawm thu an sawi a. “Kum dang ang lo takin kan police station hrang hrangte a lun lo hle. Kum dangah erawh chuan kut inthlak avang te, buaina hrang hrang avangtea police station-in bawr buai a hlawh thei thin hle a ni,” tiin The Zozam Times an hrilh.
Aizawl Police hotute sawi danin, December 14 zana curfew bawhchhia mi 100 chuang man an awm laiin, kum hlui thlah ni, December 31 zanah erawh mi 200 chuang an man thu an sawi a. Krismas leh kum thar vuak vetah dan leh thupek kengkawhin Aizawl khawpui chhungah zonal officer pangain an vil thu an sawi bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427