Prime Minister Narendra Modi chuan Thawhlehni khan Tripura-a Agartala khawpuiah, Maharaja Bir Bikram Airport-a New Integrated Terminal Building chu a hawng.
Prime minister hian Mukhyamantri Tripura Gram Samriddhi Yojana leh Tripura-a Project Mission 100 of Vidyajyoti Schools a hawng bawk.
Union Civil Aviation Minister Jyotiraditya Scindia, Tripura Chief Minister Biplab Kumar Deb leh Deputy Chief Minister Jishnu Deb Burman ten an tawiawm.
Prime Minister’s Office (PMO)-in thuchhuah an siamah New Integrated Terminal Building hi Rs, Vaibelchhe 450 chuanga din niin sq metre 30,000-a zau niin tun lai thiamna changkang ber bera thuam a ni.
Terminal building thar hi prime minister-in thlawhna tumhmunah tun lai hmanrua chhawp zel a tumna kal zela din a nih thu tar lan a ni bawk.
“Project Mission 100 of Vidyajyoti Schools hi zirna tihthata High/Higher secondary school 100-te Vidyajyoti school-a lehna tur a ni a. Project hian Class XII zirlai nuai 1.2 tualin kum thum lo awm leh tur chhungin Rs. Vaibelchhe 500 vel ruahman a ni,” tiin PMO thuchhuah chuan a tar lang.
Mukhyamantri Tripura Gram Samriddhi Yojana ve thung hi khaw hrang hranga hmasawnna thlenna tur niin an mamawh an dawn theihna tura kalpui tur a ni ve thung.
He scheme (yojana) hmang hian in tina tui lakna, electric, kawngpui tha, inthiarna mumal leh tha siam, naupangte invenna pek vek leh Self Help Group-a hmeichhiate teltir tum a ni.
Prime Minister hian Thawhlehni vek khan Manipur pawh a tlawh a. Hmasawnna hna thawh tur hrang hrang lung phumin thawh zawh tawhte a hawng bawk.
Prime Minister Modi-a’n Agartala-a hun a hman hi Trinamool Congress (TMC) chuan bei letin mi pungkhawm chu ‘mi sang tam tak nunna tiderthawngtu’ leh ‘Covid hmunpuia Tripura siamna mai mai’ niin an sawi.
“Infiam nana mipuite nunna hmangtu Biplab Deb hi zak rawh se,” tiin TMC Tripura unit hian Twitter-ah an tar lang.
Agartala thlawhna tumhmuna terminal building thar hawnnaah hian mi tam tak an pung khawm.
“Prime Minister hian mi sang tam takte nunna derthawngah a dah a! Tripura hi ‘COVID siam chhuahna hmunpui’-ah a chantir a, hei hi PM-in mipuite himna a tih ve dan chu em ni?” tiin TMC hian an tar lang bawk.
Hri leng meka inkai awlsam tak, Omicron variant a darh mek zel avangin sorkar laipui chuan ram pumah inkaihhruaina thar siam mah se Thawhlehnia Tripura-a BJP intawhkhawmna hrang hrangah chuan zawm a hlawh lo hle a. A tel ve zinga a tam zawkin hmai an tuam lo bawk.