Mizoram in 71st Junior National Basketball Championships-ah hnehna nen bul an tan a. Thawhlehni khan Andhra Pradesh nen inkhelin 69-63 in hnehna an chang.
Madhya Pradesh a Indore a Basketball Federation of India buatsaih inelnaah hian Mizoram in hnehna nen bul an tanna kawngah team tha Andhra Pradesh ai hian 3rd quarter-ah point 11 in an score hnem zawk a. An khingpuiten bul tan chhe lo mahse Mizoram in an pawtthla a. ‘Defense’ tha taka khel bawkin chakin bul an tan.
Mizoram hi an group inkhel vawi hnihna turin tukin zing dar 8-ah Puducherry nen an inkhel leh anga. Naktuk chhun dar 11-ah Bihar an hmachhawn leh bawk ang.
Chiang zawkin Mizoram team
Junior Nationals hi senior tournament angin zone a then a ni tawh lova, state hrang hrangte kalkhawm inelna hiin Mizoram hi Level 2 a awm an ni.
November 13 khan Mizoram hian selection an neih fel hnuah practice an nei tan.
Tun tumah hian Mizoram Junior team a kalte hi kum lama la naupang tak tak nimahsela tawnhriat nei tha an tam a. 2019 Sub-Junior National Basketball Championship a Mizoram team champion pui tu zing a mite awmin, a tam zawkin Mizoram Super League lamah club hrang hrang aiawhte a lo in lan tawh te anni hlawm bawk.
Coach Vanlalnunsanga chuan, “Hnamdangte lakah kan zam dawn lova, speed, accuracy leh fitness-ah min tluk lo zawk hial mai thei.” tiin an inbuatsaihna a that thu a sawi tawh.