India ram khawpui ber, Delhi chu hri lengin a luhchilh thar leh mek a, doctor leh damdawi ina thawk tam takin an kai a. All India Institute of Medical Sciences (AIIMS)-a doctor pakhat chuan hetiang zela thawktuten hri an kai chuan hripui leng hi an dawl zo dawn lo tih a sawi.
“Delhi-ah hian mi maktaduai 25 vel cheng niin kan insawi thin a, kan zinga 1% pawh damdawi inah awm ngai se Delhi NCR hian a dawl zo dawn lo,” tiin AIIMS-a neurology professor Dr P Sarat Chandra chuan a sawi tih ANI chuan a tar lang.
“Damdawi ina thawkte lehzel nena inbuaipui ngai chu phurrit thuah hnih a ni dawn a, kan dawl zo lo vang,” a ti.
Dr Chandra chuan thawktute himna ngaihtuah a tul thu sawiin, a enkawl unit-a thawk zahve zet chu tunah hian an damlo mek a, natna langchhuak nasa lem lo an nei a; mahse, hna an thawk thei lo niin a sawi a. “Doctor khawsik chu tih ngaihna a awm lo va. Ral hmatawng an nih avangin thawktute hi theihtawp chuan an inbuatsaih a ni,” a ti.
Professor hian mipuite chu hri a darh lohna tura dan zamte zawm turin a ngen a. “Khawpuia cheng 1% lek pawhin damdawi in mamawh ta se kan dawl zo dawn lo. Kan mawhphurhna theuh chu kan invenna dah loh hi a ni,” a ti.
Covid-19 kai an pun mek lai hian Delhi sorkar chuan Nilaini khan damdawi in pakuaah khum a dah belh a. Hengte nen hian Covid-19 kai enkawlna bik khum 4,350 a awm tawh a, a hmaa 3,316 awm atangin khum 1,000 chuang dah belh a ni tih Delhi-a health & family welfare department chuan a sawi.
Khum dah belhnate hi India Gandhi Hospital, Lok Nayak Hospital, Guru Teg Bahadur Hospital, Burari Hospital, Rajiv Gandhi Super Specialty Hospital, Ambedkar Nagar Hospital, Deen Dayal Upadhyay Hospital, Deep Chand Bandhu Hospital leh Dr Baba Saheb Ambedkar Hospital te a ni.
Delhi khawpui bikah hian chawlhkar liam ta chhung khan damdawi ina thawk zingah hripui kai an tam hle tih ANI hian a lo tar lang tawh a. AIIMS-ah ringawt pawh doctor 50 velin kaiin Safdarjung Hospital-ah 26 velin an kai bawk.
Ram Manohar Lohia damdawi inah thawktu mi 45 chuan kaiin an zinga mi 38 hi doctor an ni tih ANI hian thuneitute sawi a tar lang.
North Delhi Municipal Corporation-in an enkawl, Hindu Rao Hospital-ah doctor 20-in Covid-19 hi kai tawhin Delhi sorkar enkawl, Lok Nayak Hospital-ah pasarihin an kai bawk.