Rajasthan-a putar kum 74 mi chu India-a Omicron variant vanga thi hmasa ber a nih thu union health ministry chuan Nilaini khan a sawi.
Thuneitute chuan zunthlum leh natna benvawn dang nei niin an sawi.
India-ah hian Omicron kai hi mi 2,630 chuang an awm tawh.
Darkar 24 liam ta chhung khan mi 90,000 chuang zet Covid-19 kai hmuh chhuah thar an ni a, chawlhkar khat liam taa ni khata hmuh aiin a let ruk dawnin an tam zawk a. Mi thiamte chuan Omicron variant inkai darh ni ngeiin an ngai.
India-ah hian darkar 24 liam ta chhungin mi 325-in hripui hi an thihpui leh hman a; mahse, Omicron vanga thi bik chu mi pakhat chauh a la nih thu thuneitute chuan an sawi.
“Omicron kaihhnawiha thihna chu a ni ngei a, kum upa tawh, zunthlum leh natna benvawn dang nei sa a ni,” tiin Health Ministry Joint Secretary Lav Agarwal chuan Nilainia thuthar lakhawmtute a kawmnaah a sawi.
Indian Express chanchinbu chuan Udaipur-a damdawi inah December 15 khan dah luh a ni a, ni 15 hnuah a thi ta niin an tar lang a. Doctor-te chuan invenna a bikima la tawh niin an sawi.
Nilainia thuthar lakhawmtute kawmnaah hian Indian Council of Medical Research (ICMR) chief Balram Bhargava chuan Omicron variant hian khawpui liante chu a chim nasa tan mek niin a sawi a, punkhawmna ang chi reng reng pumpelh a that thu a sawi bawk.
Agarwal chuan Maharashtra, West Bengal, Delhi, Kerala, Tamil Nadu, Karnataka, leh Jharkhand te chu chawlhkar khat bi zela hri kai tamna leh endik zinga a kai hmuh tamna an nih hlawm avangin ngaihven ngai zual state an nih thu a sawi.
India-ah hian mi maktaduai 35 chuangin Covid-19 kai tawhin mi 4,82,000 velin an thihpui tawh.
Nikum April leh May vel khan hri leng thawh hnihnain na taka nuaiin damdawi inah khum, oxygen leh damdawi indaih lohna avangin mi tam tak an thi.
Tuna hri thar, Omicron hi zirchian tawhna chinah chuan a hmaa lengte aiin natna a thlen na lo zawk a, damdawi in luh pawh ngai vak lo a ni a, a lutte pawh awm rei ngai lo nia hriat a ni.
Heti hi ni mah se mi thiam leh doctor-te chuan a kai an tam miau chuan damdawi in indaih lohna a thleng leh tho dawn niin an ngai a. India-ah phei chuan state lian tak takah inthlan a awm dawn avangin vantlang inkhawm huaihawt a ni dawn a, hengah hian a darh awlsam lehzual dawn niin an sawi.
State eng emaw zatin inkhuahkhirhna an kalpui leh tawh a, heng zingah hian Delhi leh Maharashtra pawh an tel a. Punkhawmnaa tel thei zat bituk te, zan lam pawn chhuah khap leh inkhuahkhirhna dang tam tak an zam.