Serchhip district chhunga kum 15 atanga 18 inkarte hnenah nimin atang khan Covid-19 vaccine pek tan a ni a, nikum lama vaccine la tawhte hnenah chawlhkar thar atangin Precaution Dose pawh pek chhuah tum a ni bawk.
Covid-19 vaccine pek hna kalpui tan pual hian nimin chawhma dar 11 khan Presbyterian English School New Serchhip-a Vaccination Centre-ah a hawnna neih a ni. He hunah hian District Bawrhsap Kumar Abhishek IAS chuan tleirawlte hnena Covid-19 vaccine pek chhuah theih a ni ta chu lawmawm a tih thu a sawi a. Vaccine -e hi zirchianna leh enchhinna neih hmasak vek a nih avangin lak a him tih a sawi.
District Surveillance Officer Dr. Lalngaihawmi Chhangte kaihhruai he hunah hian Serchhip CMO Dr. Lalzawmi pawhin kum 15-18 te hnena vaccine pek hna hi tun thla ni 3 khan Aizawl-ah bul tan a nih dan te, tunah hian district hrang hrangah kalpui chhunzawm mek a nih thu te leh hri lengin ziaawm lam a pan a nih loh chuan vaccination certificate a la pawimawh zel dawn niin a sawi.
Serchhip District-ah hian kum 15-18 inkar mi 3,608-te hnenah Covid-19 vaccine hi pek tura ruahman ni mah se, kum 15 leh 17 inkarte hnenah Covaxin pek tur niin kum 18 chinte hnenah Co-vishield pek tur a ni a, ni 28 hnuah dose hnihna pek leh tur an ni dawn a ni.