Nimin khan Mizoram pawn atanga lo lut, Lengpui Airport-a khualzinte atangin Covid-19 kai hmuhchhuah thar mi 38 an awm a. Khualzin lo lut turte tan vaccine certificate pawm a ni tawh lo.
January 6, 2022 khan Mizoram pawn atanga khualzin mi lo lut turte tan Covid-19 leng laka himna tura dan zam (SOP) chu tihdanglam niin, Mizoram sorkar chuan SOP thar a tichhuak a, dan thar hi Lengpui Airport-ah hian hman nghal a ni a. Mizoram pawn atanga Lengpui Airport-a khualzin lo lut, sorkarin a pawm china RT-PCR test-a negative result nei te tih loh chu RAT hmanga endik vek an ni a. Flight paruk atanga khualzin, India ram hmun hrang hrang atanga Mizoram lo lut zingah Covid-19 kai mi 38 hmuh chhuah an ni.
Hri kai hmuh chhuah tharte hi ambulance awm sain a daih vek loh avangin lirthei dahsa nei mi thenkhatm a khalhtu tur pawh hri kai tih hriatsate chu an lirthei hmanga kaltir an nih thu sawiin, “Heng hri kaite hi Covid care facility-ah kan dah vek lo a. Task force-te phalna an neih chuan mahni ina khung hran tura tih an ni. Mahse, Lengpui Airport-ah hian task force phalna hi an neih leh neih loh endik a, kan finfiah hnuah chauh phalna kan pe a ni,” tiin Dr Elsa Lalramzauvi, Medical Officer i/c Lengpui Airport chuan The Zozam Times a hrilh.
Dr Elsa Lalramzauvi hian SOP thar tihchhuah a nih atang hian Lengpui Airport-ah pawh vaccine certificate an pawm tawh loh thu a sawi bawk.
Mizoram sorkar chuan State Level Expert Team on Covid-19 Management-in rawtna a siam angin nimin khan luhka hrang hrang kaltlanga Mizoram lut turte tan hri leng laka himna tura dan zam (SOP) thar a tichhuak a. Dan tharah chuan Mizoram entry point-ah RAT test ngei tura tih a ni.
SOP tharah hian Mizorama lo lut khualzin zingah RAT-a positive-te chu khung hran nghal tura tih an ni a, Covid-19 enkawl dan tur siamsa angin enkawl chhunzawm tura tih an nih laiin, RAT-a negative result nei, natna lang chhuak nei lote chu khung hran ngai lo mah se, CAB uluk taka zawm tura tih an ni.
Hetih lai hian Mizoram sorkarin a pawmpui laboratory atanga Mizoram luh hma darkar 72 chhunga RT-PCR/Trunat/CBNAAT negative test report nei leh Mizoram luh hma thla thum chhunga home isolation emaw, Covid Care facility atanga discharge certificate an issue-na nei khualzin tan RAT neih ngai lo tura tih a ni a. Certificate nei chunga Covid-19 symptom nei erawh chu RAT an nei ngei ngei tura tih a ni thung.