Mizoram People’s Forum (MPF) hruaitu hluiten nimin khan hruaitu tharte hnenah mawhphurhna an hlan.
Hruaitu thar mawhphurhna inhlana hi Synod Office Committee Room I, Aizawl Mission vengah neih a ni. He hunah hian president tanglai Rev Dr C Lalhlira, Synod Moderator kal chhuakin thutkhawm a kaihruai a. General secretary tanglai, Rev. R. Lalnuntluanga’n general seretary ruat thar, Rev. Lalramliana Pachuau hnenah mawhphurhna a hlan a. Ani hian 2022-2024 chhung a thawk ang.
President kal chhuak, Rev Dr C Lalhlira’n kum thar lama MPF president thar tur, Rev Dr Vanlalnghaka Ralte, Synod Moderator hnenah mawhphurhna a hlan nghal bawk.
Heng bakah hian MPF hruaitu thar atan joint secretary pahnih Lalbiakengi leh Maria; Finance Secretary Vanlalthanga leh treasurer atan Lalramnghaki te bakah, vice president atan kohhran leh pawl hrang hrang aiawhte leh senior adviser te an ruat bawk.
Mizoram People’s Forum (MPF) chuan Mizorama politic kalphung siam dik te, inthlan laia vote hralh leh inleisak tihreh te, inthlang tura political party-ten beihpui an thlaknaa thu tiam uchuak an tiam lohna turtein hma an lak thin thu leh, Kristiante zirtirna nena Mizoram politics inmil tur zawnga hma lak zel an tum thu an sawi a ni.