NIA-in AR colonel, a nupui leh an fapa thattute luman chhiar


National Investigation Agency (NIA) chuan November thlaa Manipur-a Assam Rifles-te beia colonel, a nupui leh an fapa bakah sipai dang pali thahnaa inhnamhnawih hel mi 10-te chin hrilh theih hnenah Rs. Nuai li atanga nuai riat inkar pek a tiam.
46 Assam Rifles commanding officer, Colonel Viplav Tripathi leh a thuihhruaite hi Behiang border post tlawhin Khuga-a battalion headquarters pana an haw leh lam chu People’s Liberation Army leh Manipur Naga People’s Front nia inchhalten an lo lambun a ni.
NIA thupuangtu chuan he lambunna thlenga a bultumtute luman hi a chhiar a. Chaoyai, Pukhrambam Mani Meetei tia hriat bawk leh Sagolsem Inaocha, Ranjit Naorem tia hriat bawkte luman atan Rs. Nuai 8 a chhiar a, Sanatomba luman atan Rs. Nuai 6 a chhiar bawk.
Hengho bakah hian Khaba, Khwairakpa, Joseph, Rocky, Balin, Kanta leh Nongyai, Nongphai tia hriat bawkte lumanah Rs. Nuai 4 theuh a chhiar bawk a. Heng mi 10-te hi Manipur-a mite vek niin an chin hriat an ni hlawm lo.
Nikum November 27-a thil thleng hi NIA chuan chhuiin thuchhuah an siamah, “Heng mi rinhlelhawmte hi man emaw, an awmna chin min hrilha min pui theite chuan NIA-in number a tar lan leh email-address a dahah hrilh theih a ni,” an ti a. A hrilhtu chu thup tlat a nih tur thu an sawi bawk.
46 Assam Rifles CO Colonel Viplav Tripathy, a nupui, an fapa kum riat mi leh sipai dang palite hi Manipur-a India-Myanmar ramri hnaih taka ramria sipai duty-na hmun an tlawh haw lam chu November 27 khan lambuna thah an ni.
Churachandpur district-a beihna thlengah hian sipai paliin hliam an tuar bawk a, beihna hi chawhma dar 10 velah, Behiang police station huam chhunga S Sehken khaw bula thleng niin an sawi.
Manipur leh India hmarchhak state dangah tun hma chuan hel an tamin venhim hna thawktute pawhin beih an tawk nasa thin a. Tun hnai kum eng emaw zat erawh sipaiten huang zauhvin hel an tawmim a, a la awmte pawh Myanmar-ah an lut nasa a. He thil thleng hi tun hnai kum tam tak chhunga Manipur-a venhim hna thawktu beihna lian ber a tling a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427