Indian Prime Minister Narendra Modi chu Nilaini tlai khan thil duh lohna lantirtuten Punjab-a kawng chhawngah minute 20 vel an dang a, hei hi venhimna hlawhchhamna lian taka ngaih a ni.
Lo dangtute hian lo neitute thihna thlenga a mawhphurtua puh zinga a fapa a tel avangin cabinet minister pakhat chu bâng turin an lo nawr a ni.
“He thil hi prime minister venhimna kawnga chetphelhna lian tak a ni,” tiin union home ministry chuan a sawi.
Hetih lai hian Punjab Chief Minister Charanjit Singh Channi chuan a kaihhruai sorkar lam atang chuan venhimna lama chetsualna engmah a awm lo niin a sawi ve thung.
“Prime minister pisa hnenah khaw awm dan fel lo avang leh duh lohna lantirna avangin a zinkawng zawh titawp turin kan ngen a. An kawng an thlak thut tih hi hriattirna engmah kan dawng lo va, keini lamah chuan chetphelhna engmah a awm lo,” tiin Channi chuan Nilaini khan thuthar lakhawmtute a hrilh.
Modi-a hi Nilaini tuk khan Bhatinda tumhmun a thleng a, National Martyrs’ Memorial pana thawk zui tur leh a hnua helicopter hmanga vantlang inkhawmna hmun neih tur pan tura tih a ni.
Khaw awm dan fel lo avangin ruahman angin a kal ta lo va, khaw hmuh theih chin a chian theih loh reng hnuah a hote nen lirtheiin an che chhuak ta a. Memorial thlen hma km 30 velah lo dan an ni ta a ni.
Modi-a hi inthlan campaign-in Ferozepur khawpuia vantlang inkhawmah inlan tur a ni bawk a; mahse, home ministry chuan venhimna hlawhchhamna a awm avang hian kal lovin tumhmun an pan leh ta zawk niin a sawi.
“Prime Minister Modi hi Ferozepur tlawh leh turin ka sawm a, kan prime minister hi kan zah em em a ni,” tiin Channi chuan a sawi.
Home ministry chuan Punjab sorkar atangin hetianga ‘venhimna lama chetphelhna lian tak’ thleng chungchangah thil thlen dan kimchang hriattir turin an ti.
“Tih dan phung angin engkim a tul ang ruahman lawk tur a ni a, venhimna pawh inring renga dah tur a ni,” an ti.
Channi-a chuan venhimna lama chetsualna a awm a nih phawt chuan an sawi chhuah tur thu a sawi a. A hma zanah lo neitu lungawi lo tam tak chu an thil kalpui titawp turin a hmin a; mahse, rinlawk loh takin Ferozepur-ah hian tam vak lo an pungkhawm leh ta niin a sawi bawk.
Nilainia prime minister-in a zinkawnga harsatna a tawh chungchangah hian Ningani khan President Ram Nath Kovind chuan Prime Minister Modi hi a hmu nghal a, thil thlengte an sawi dun.
President’s secretariat chuan Kovind-a hian Modi-a hi Rashtrapati Bhavan-a hmuin a thil tawnte a zawt tih Twtter-ah an tar lang a. “President hian venhimnaa chetphelhna thleng hi a ngaihven hle a ni,” an ti.
Lungawi lote hian October thlaa mi pariatte thihna thlenga mawhphurtua a fapa puhna avangin union home minister of state Ajay Mishra chu bâng turin an nawr a ni.
Mishra car ni ngeia hriat chuan Uttar Pradesh-a lo neitute pung khawm chu an hnung lam atangin a chil a, mipa pali an thi a. Lo neitute chuan minister fapa, Ashish Mishra chu he thil thlengah a mawhphurtu niin an ngai a ni.