Serchhip bawrhsap Kumar Abhishek-a’n tunhnaia NAAC grade A hmu thar Govt. Serchhip college chu an hlawhtlinna lawmpuina hun nimin khan a buatsaihsak.
Serchhip bawrhsap chuan Serchhip college-in India rama college tha berte zinga mi ni phak khawpa hma a sawnna kawnga thawktu zawng zawngte a lawmpui thu sawiin, “District tan hmasawnna ropui leh chhuanawm tak a ni”, a ti a. “Mizoram hmun dangte leh state dang atang pawha rawn pan tlak zirna in tha a ni tawh a ni”, a ti.
Hma lam pan zel tura fuihin, an mamawh an ngaihtuahpui theih chi apiangah puih an inhuam reng thu bawrhsap chuan College hotute chu a hrilh a. Principal Lalremsiama kutah lawmpuina thuziak a hlan a ni.
Govt. Serchhip college principal Lalremsiama pawhin bawrhsapin lawmpuina thilpek hlu tak a pe chu lawmawm an tih thu a sawi a. College-in an mamawh a hnena an thlente theihtawp chhuaha a ngaihtuahpui tawh thinnaah lawmthu a hrilh bawk.
Govt. Serchhip college hi kum 2021 December khan national assessment and accreditation council (NAAC) peer team ten endikin, tun thla ni 4 khan an endikna report tichhuakin tehna chi 7 ah 3.18 point hmua Grade A an kai thu an rawn hrilh a, he grade hi kum 5 chhung a dam dawn a ni.