- Krismas Cake leh Card ka dawng
- Naupai tawh lo tura insiam (tubectomy) nu pakhatin Doctor a khing!
- Lallunghnema, Charity Lodge
Kum Thar 2022 kan lo chuang kai ta reng mai!
Chhiartute chibai ka buk lawm lawm a che u.
Nikum chhung khan vawi khat mah bahlah lovin ka Huang ka luah thei,ka lawm hle. He thu hi 2021 chhuak hnuhnung berah khan ka sawi tawh. Khang article, mipui tapchhak zawl leh choka nghawng thei te kha a buin tih chhuah ka tum.A bu hmingah chuan dangdai deuh tak vuah ka tum a ni.
A dam han hauh phawt zel mai ila,thil tha tih kan tum tlat zel ang chu.Chu thil tha tih chu kan dam chhan ni mawlh rawh se.Kumin hian Planning ka nei nual.Consumer Awareness YouTube channel siam ka tum .Ka telna WhatsApp groupah nasa zawka consumer thil ziah ka tum bawk. Centre din turin hma ka la mek bawk.Sawrkar pur lova,kal hram hram ka tum a ni.Tunah hian ka Consumer lehkhabu 6-na chu a kawm siam mek a ni a, Mipui chhiar theih tura pho chhuah thuai ka inbeisei. Keini Consumer Activist-te leh Columnist-te hian he Consumer politics chanchin tha hi kan hril zel dawn a.Dawrkai leh sumdawngten an nawm an maka inthlahrunna nei lek lova,an bungrua an chheprelh thinte, an bungraw man an duh ang anga an tito chiam chiam thinte,hman tlak lo bungrua an hralh chhuak thinte,thil man ziahna thai chhiat ching thinte, customerte laka inluling a, be tha duh lote,mipui mamawh aia hralh chhuah tam theihna tur ringawt ngaihtuahtute,advertisement uchuak tak hmanga an bungrua fak mawi thintute hi an demawm a. Hengho hian consumerte chu engahmah an ngai lo,tihna a ni.Kristiannaa kan ngheh lohzia tilangtute an ni.
Chu a chhapah hna thawktu Kristiante hna chhiatzia hriat leh hmuh hian Pathian thu kan awih that lohzia a lang leh thin a ni.Hetiang mi kan nih avang hian Kristian Hunpui lai pawhin Krismas discount leh Krismas sale-in awmzia a nei ngai lo.Heng Hun lai hi Consumerte tana phurrit thlen hun a ni thin Mipuiin kan tuar chuan consumerten kan tuar tihna a ni a.Khang Hunpui liam ta kha consumerte tan malsawmna nge? consumerte tana tahna leh lungngaihna tih hi kan inzawt ru fo thin a ni.
Kei ve hi neih loh chu thu hran ni se,Covid hri leng vel avang hian,
Rual ka pawl lo khawp mai.
Rual ka awt hek lo.
Aizawl Bazarpuiah hian thla hnih vel liam ta atang khan ka pen lut tawh lo.’ Pi Duhi tena, ‘Mas shopping’ an tih ang hi a rim a ra pawh ka hre lo.Hriat pawh ka tum lo. Mahse, tuk khat chu ka nupui in zingkarah Bazara kalin kekawr, incheina tlak,thlasika hak tur chi second hand pahnih lawng lawng min leisak ve.Hei zawng hi a ni. Mahse, keimahah chuan ropui ka ti! Thlasik kekawr hak tur ka nei ta! ka lawm a, ka lawmzia mai chu,lawm tak ka ni ringawt! Heng incheina tlak kekawr lum second hand ha chung hian Pathian Biak Inkhawm ka kai hruai thei a.Pulpit tlang atangin, ‘Nangni, Pathian Kohhranhote u, ka tihpui zak zak thova, thleng sang ka inti a, ka lawm veng veng a ni.
Kumin kan Kutpui Hun laia mipui kan inpang aw zial mup mup lai hian Bazar ah shopping ka ti ve ngai lova,ka hmu ngai hek lo. Chutih laiin, a lian emaw,a te emaw,Mas pual thilpek ka dawn tam kum a ni ve tlat! Kei ve teh thlawt hian! A thlawnin bawnghnute in tur ka thianpa, unauva ka neih thin hnen atangin ‘Mas Eve khan ka dawng a. KNP hnen atangin Mawza lum ka dawng a, ka monu fel hnen atangin kamis ka dawng a, hmai phihna tur bik sahbawn ka fanu duh tak hnen atangin ka dawng bawk. Tin, kan unau nuin Computer tha tak mai min present ve leh zel a! He computer phei hi chu consumer protection service atan a tangkai hle dawn a ni. Heng thil thlawn pek ka dawnte hi ka beisei loh thil vek a ni a.A lawmawm ka ti hle.
Heng zawng zawng bakah hian ka beisei ngai loh, mumang pawh a, ka man ngai loh College Venga chhungkaw pakhat hnen atangin Krismas Cake leh an chhungkaw thlalak chuanna Krismas Card ka dawng nawlh mai! Hei zet hi chu ka tan thil ropui tak, ka ti lo thei lo. Ka hun kal tawha ka chunga la thleng ngai lo, lo thleng a ni ve tlat,’Thilmak,’ ka ti ve tawp mai a ni.A man zawng a chhut chuan a hlu lem lo mai thei e. Mahse, lawmna leh duhsakna entirna (token) a ni a, hlu ka ti hrim hrim a ni.
He Thilpek leh ‘MasCard thlate hi ka lakpui a,inthlahrung takin ngam tlakho ka thawn kual ta chiam a.Min lawmpui hle.,Min duhsaktuten lo thlir ve se, tih ka duh vang a ni a Chu bakah consumer awareness atan ka duh a ni. Consumer Protection activity ka kalpui hian hlawhtlinna ka neihpuite hian lawmthu sawi nan pawisa min pe ngai lova,duh pawh ka duh hek lo.Ka beisei bawk thin lo. Lawmthu sawina erawh ka hlimpui viau thung a ni.
Khatia, Krismas Ni a ka Inkhawm bang kha in ka thlen veleh kan chaw ei dawhkan lam ka han hawi phei a. Ka rin loh tak maiin Mas Cake hrawl deuh mai leh Card khawng hlai hlep hlup, chhungkaw pakhat thlalak chuanna hi ka hmu nghal thei a.Ka fapa chuan chu thil thleng mak tak chu min lo hrilh mawlh mawlh a, thla ka lakpui nghal zung zung a. Ngam tlak ho ka thawn ta chiam mai a ni. Min lawmpui ve khawp mai. Pu Hnem, i thil sawi hi a va ho ve maw le,lo ti suh u, Hetiang ang hmuh hi har deuh mai a nia! Min lawmpui ve ngawt mai teh u.
Hetiang hi thil lo inmun dan chu a ni.
Nia,tlem lai deuh khan College Veng nu pakhat chu an fanu Goa a awm chuan Parcel a thawn a. A thlen tawpna tur,Aizawl Dak In a lo thlen meuh chuan chu Parcel chu a lo chhe nualin an thil dawn tur, bungruate chu an hmu kim lova. He an chunga thil thleng hi activist ka nih angin min hrilhin ka hnenah an lo zualko ve ngawt mai a. A tawi zawngin sawi mai ila, Postal Department ka biak sak a, bungraw kim lo hu pawisa pe turin ruahmanna siam a ni ta a ni. Pawisa an sen avangin Consumer an ni a, Dak In pawh hi service provider an ni bawk. Bungraw himna chu an mawhphurhna a ni a.Bungruate chu him dam takin an vawng tlat tur a ni.Chutiang a nih loh chuan Consumer Protection Act,2019 bawh chhiatna Deficiency in Service a ni dawn a. Hrem theih an ni. CPA,2019 section 2(11) kalh a ni. Tichuan, Postal Department hian bungraw kim lo hu hi an chawi ta a ni. He thu hi ka column hmasa lamah khan ka ziak nual tawh nghe nghe.
Consumerte hnena thurawn ka pek duh thin, ka sawi fo chu, a theih chen chen chu Consumer Court hi pum pelh tur tih hi a ni. Khingpuite nena inrenna hi a tha ber zel a ni. Mahse, Consumer Court pan vek vek chuan huaisen taka kan khinte chu kan hmachhawnin an ep ngam tur a ni. Tlan chhe paha Consumer Commission-a complaint theh luh hi mi dawihzep hna a ni. Thubuai tling lo leh belh chian dawl lo complaint theh luh phei chu hrem theih a ni.
Tin, heti hi a ni a, hmanni lawk khan Karimnagar District Consumer Commission chuan Nursing Home pakhata Doctor pakhat chu compensation chawi turin Thupek a chhuah a ni. Complainant nupui hi kum 2009 khan he Doctor hian nau pai tawh lo turin a zaisak ( tubectomy operation) a, operation cost Rs 20000/- a la nghe a ni. Mahse, kum hnih a lo ral meih chuan mumal lo taka he nu hian thi (irrigular period) a neih avangin an doctor chu an pan leh ta a. Doctor-in investigation a neih meuh chuan he nu hian nau a lo pai chu niin, a hrilhai thlak hle ngei ang le. Pawisa senga insiamtir an nihna zawn atangin he nu hi consumer a ni a, dikna leh chanvo a nei a ni. Insiam hlawhchham chu Consumer Protection Act sec.2(11) thlirna atang chuan fimkhur lo leh inthlahdah (deficiency in service) a ni a, Dan bawhchhetu chu hrem theih a ni.
Tichuan, he Vai nu pasal hian he Hospital leh Doctor te chu Karimnagr Distrct Consumer Disputesi Redressal Commission hmaah a khing ta a ni. He Commission -in version a thehluhtirnaah chuan Opposite Party chuan International Standard angin insiamtirtu chuan harsatna a tawh chuan operation tih ni atanga chawlhkar riat(8) chhungin a zaitu doctor hnenah an sawi tur a ni.Tin, operation tih hmain he hmeichhia hian thutiam a ziak a ni, tin, tubectomy hi 100% a hlawhtling kher lo tih he nu hi hriattir a ni, tiin thiamthu a sawi a. Mahse, he doctor hian document an lo nei hauh lova. An thusawi chu Commission chuan thu tlingah a ngai ta lova, thiam loh an chantir ta zawk a ni. Tichuan, Commission chuan hetiang hian hremna (penalty) a tichhuak ta a ni. Doctor hian compensation Rs 200000/- a chawi ang a, rilru tihnatsak manah Rs 25000/- a chawi bawk ang. Commission a kal nana senso Rs 5000/- a chawi bawk ang. Hun bi tiam chhunga Opposite Party hian Commission Judgement an tihpuitlin loh chuan 9% p.a.interest a chawi bawk ang, tih a ni.
Heta kan zir chhuah tur chu Document pawimawhna hi a ni. Thu buai, hla buai sawi dawn chuan finfiahna tha tawk neih a ngai a ni. Thil lei leh hman apiangin a theih chin chinah cash memo lak zel tur a ni. Kan intihmuh bawk ang. Reciept leh Cash memo tel lo chuan thu hi tisaah a chantir ngawt theih thin loh a ni.
Han ti ve leh ngawt thin ila, District Consumer Forum a ka awm ve lai pawh khan Naupai lo tura insiamtir, hlawhchham, rai leh si khan Damdawiin a khing tawh bawk a. District Consumer Forum (tunahCommission tih a ni tawh-llh) chuan he Complaint hi kan ngaihtuah a, mawhphurtu doctor khan thiam a chang ta lo niin ka hria.