Inrinni khan Aizawl Bawrhpui Dr Lalhriatzuali Ralte hoin Aizawl Municipal Corpoartion (AMC) leh Aizawl district huam chhunga Covid-19, a bik takin hri thar, Omicron a darh loh nana SEC inkaihhruaina a tihchhuah bawhzuiin inrawnkhawmna an nei.
Aizawl SP Office, Conference Room-a inrawnkhawmna neihah hian SEC-in sorkar duan inkaihhruaina, SOP leh CAB te mi tinin ngaih pawimawh thar mai bakah khauh taka kalpui a tul thu an sawi a. Mipui tana harsatna thlen thei zawnga ruahmanna siam hi an duh ber ni lo mah se, mipui him tlan nan siam a ngai fo thin chu mipuite hriatthiamna an ngen a ni.
Thutkhawmah hian AMC area chhunga inkaihhruaina kalpui tur thenkhat, a bik takin sakhaw biak in leh inkhawm, bungraw load leh unload, mimal tui chawi, restaurant, bazar leh dawr hawn dan chungchanga inkaihhruaina kalpui dan tur duan leh ruahmanate sawiho a ni.
He inrawnkhawmnaah hian sumdawng pawl hruaitute chuan rei tak inkharkhipna lo kalpui tawhin sumdawngte a nghawng nasat avangin mipuite himna dah pawimawh chunga dawr leh bazar hawn dan turah inhawn chhawk tlem thei ang bera ruahmanna siam turin an ngen a ni.
Thutkhawmah hian Senior SP Traffic, Aizawl; Aizawl DC office-a thawktu aiawh, CMO (East leh West te) MKHC, MIMA, MBCC, Joint NGO leh Aizawl City Local Councils’ Association hruaitute an tel a ni.
DAWR INHAWN CHHAWK DAN TUR
Group A (Thawhtanni apiangin an inkhar ang)
- Thawmhnaw, pheikhawk dawr.
- Second hand dawr.
- Puan, puanthan leh la zawrhna.
- Puanthuina leh a kaihhnawih dawrte.
- Pangpar zawrhna.
- Group thennaa lang ve lo dawr zawng zawngte.
Group B (Thawhlehni apiangin an inkhar ang)
- Computer, mobile phone, electronic appliances dawr leh hetiang chhe siamna te.
- Printing, photocopy shops etc.
- Stationery leh lehkhabu dawr.
- Dispo materials (dispo cups/plates etc) dawr.
- Arms & Ammunitions dawr.
Group C (Nilaini apiangin an inkhar ang)
- Hardware/Insakna bungraw chi hrang hrang zawrhna dawr etc.
- Autoworks/Spare Parts dawr .
- Khawl/machinery dawrte leh hetiang chhe siamna te.
- Tarmit dawr.
- Goldsmith, jewellery dawr.
Group D (Ningani apiangin an inkhar ang)
- Furniture dawr.
- Sports bungraw zawrhna dawr.
- Sana zawrhna leh siamna dawr.
- Miniso/Vishal/Mart etc leh Mall ang chi dawrte.
- Network Marketing shops (Vestige, Oriflame etc).
Group E (Zirtawpni apiangin an inkhar ang)
- Toys, cycle dawr.
- Naute mamawh zawrhna dawr.
- Bungbel leh eirawngbawlna hmanraw zawrhna.
- Cosmetics/makeup dawr.
- Nihliap/pheikhawk/Bag repair/chhe siamna dawrte.
Inrinniah dawr zawng zawng hawn phal a ni.
//////////////