United States-in Afghanistan an chhuahsan lai vela Afghan nausen mipa, a chhungte nena inthen ta chu thla eng emaw zat hnuah an inhmu khawm leh ta.
Taliban-in August thlaa ram pum an thunun khan Afghan tam tak chuan an ram chhuahsan tumin nasa takin an bei hlawm.
Thla hnih mi lek, Sohail Ahmadi-a pawh American sipai pakhat hnenah Kabul thlawhna tumhmun hungna pawn lama a duty lai chu mi sang tel innek karah hlan a ni a. A chhungte hi a chhungah an awm a, an hmu zui ta miah lo a ni.
Naute pa, US embassy-a securoty guard, Mirza Ali Ahmadi leh a nu, Suraya leh an fate pali hi US-ah thiar chhuah zingah an tel zui ta a ni.
Thla li zet an fapa chin hriat loh hi an zawng tawh a. Hetih lai hian November thlaa Reuters-a Sohail-a an zawnna an chhuah hnuah kum 29 mi, taxi driver Hamid Safi-a hnen an chhui thleng ta a ni.
Safi-a hian a sawi dan chuan Sohail-a hi tumhmunah amah chauhva a lo awm thu a sawi a. A chhungte a zawn hmuh mai loh avangin inah hawnin a nupui leh a fa dangte nen an enkawl ta tih a sawi.
An nausen chhar hi Mohammad Abed tia a hming sain a Facebook page-ah pawh a fate nena an thlalak zingah a tar lang tel.
Sohail-a chin an hriat hnuah hian a pu, hmarchhak lam Badakhshan province-a cheng, Mohammad Qasem Razawi chuan Kabul hi pan vang vangin a dil let ta a. Safi-a hian phal mai bik lovin a chhungte nena US-a lak chhuah ve a phut niin Reuters chuan a tar lang.
Chawlhkar sarih zet an indawta Safi-a pawh rei vak lo an hren hnuah Taliban police chuan chhungkaw pahnih hi inremna siampuiin naute pawh Inrinni khan a pu hnenah an hlan ta tih Reuters chuan a tar lang.
A nu leh pa chuan naute an inhlan lai video kaltlanga an hmuh chuan an hlim tak zet tih an sawi a. “A lawm nan kan zai a, kan lâm bawk,” tiin Razawi-a chuan a sawi a. “Inneih ang mai a ni,” a ti.
Sohail-a hi a nu leh pa leh a unaute chenna, US-a Michigan state-a lak a nih theih nan ruahmanna siam thuai an tum.