Hun rei tak natna khirhkhan tak SLE-in a tlak buak hnu ah Mizo Idol star hriat-hlawh, Desy Lalnunsangi (29) chuan Inrinni khan a lei zinkawng zawh taw[in, nimin Pathianni chawhma dar 11 khan an chenna Khawhai ah ropui taka vuiliam a ni.
Mizo Idol 2009 Top 5 Desy hian uitu leh thlahleltu a ngah hle a, an khaw chawimawitu ni bawk hi Young Mizo Association; Khawhai Branch leh Village Council Khawhai Joint Committee chuan ropui thei ang berin an thlah liam a, an zalhna tur hmun an thlen hmâ zawngin kawng tluangin a hlasak te an play a, YMA member zawng zawngte’n pawm dum nen an thlah liam a, a bik taka thlan siamna hmunah ngei ah an zalh.
Hripui leng boruak rit tak vangin Idol-a a thiantha te leh thawhpuite erawhin an tawiawm thei lova, pawi an tiin, hrehawm an ti hle. Whahtsapp lamah Idol Inpui Group-a awm te chuan a dam loh lai khan cheng singthum sangthum leh zahnihin an kan a, a na zual tih an hriat hnu-ah pawisa khawn khawmleh ni mah se, an hlan hman ta lova, khawn chhunzawm zel niin, remchang hmasa berah a chhungte hnenah an hlan ang.
Tarlan tawh angin, insawiselna a neih hi a rei tawh a, hripui leh chhungkaw harsatna neuh neuh avangte’n kum khat dawn enkawlna mumal a dawng thei lo. Boruak te tha chhovin, nikum kumtawp lam khan A pa ute’n Aizawl lamah enkawlna tha zawk dawng turin an hruai a, mahse a natna a lo khirh tawh em vangin hmasawnna hmuh tur a awm meuh lo.
Desy hi Mizo Idol 2009 khan Top 5-ah inhlang chhoin, Judge te leh mipui lawm a hlawh a. Hmabak eng tak neia sawi a ni. Idol zingkawng a tluang chho zel nia ngaih a nih laiin, stage a sâng tawh a, zaisual/tihsual palh a pawi em avang khan a thleng sâng ta lo mai nia sawi a awm.
A tlâk chungchangah thawm a ring a, sawizui a hlawh. Amah ngaihsangtute leh zaithiam titute lung a awi lova, Judge te leh Mizo Idol buatsaihtu Zonet thlengin sawisel an hlawh nasa. A boruak a lian a, a tla ta mai kha an hrethiam thei lo. A hun laia titi lian tak a tling. Idol zinkawngah hian zaithiam lar Saizikpuii Sailo (L) khan a buaipui a, zaite zirtirin, kawng hrang hrangin a support thin a, a hlate pawh a saktir.
Hemi hnu hian Brighter Higher Secondary School-ah kalin, an hotute’n a senso leh tul dangte pawh an free vek a ni. PUC-ah kal chhunzawm lehin, zawi zawiin zai lamah a thawm a reh zui ta a ni.