Sorkar hnathawk pawl, FMGE&W chuan January 7, 2022 khan finance department changtu, Chief Minister Zoramthanga chu hmuin sorkar hnathawkten a hun taka hlawh an lak theih loh avanga mi tam takin harsatna an tawh mek thu an thlen a, an hlawh a hun taka an lak thin theih nan hma laksak turin an ngen tih an hrilh.
An thu thlenah chuan Supreme Court-in February, 2021 khan sorkar hnathawkte chu a hun taka hlawh pek thin tur an nih thu leh pek tlai an nih chuan ‘interest nena pek tur an ni’ tia judgement a lo siam tawh thu ziak langin, hetihlai hian hun eng emaw chen atang khan Mizoram sorkar hnathawk eng emaw zat chuan a hun takah hlawh an la thei thin lo tih an tar lang.
FMGE&W chuan sorkar hnathawkte chu loan chi hrang hrang la an nih hlawm thu te, hlawh an lak tlai hian a hun takah loan an rul thei thin lo va, penalty tam tak an chawi tawh tih sawiin, hei bakah hian sorkar hnathawkte chu an hlawh ringa khawsa tawk tawk an nih hlawm avangin a hun taka hlawh an lak theih lohna a rei tawh avangin chhungkaw khawsak a buai thin tih an sawi.
An pay rules anga Dearnesss Allowance (DA) tihpunsak thuai turin FMGE&W chuan chief minister chu an ngen nawn bawk a. DA tihpun dilna chu ziaka vawi thum a hnenah an thlen tawh chungin tun thlengin tihhlawhtlinna a la ni lo tih an sawi a, “Mizoram sorkar hnathawkte DA rate hi central sorkar hnathawkte rate ang pek tur a nih thu kan pay rules-ah hian chiang takin ziah a ni,” an ti.
FMGE&W chuan central sorkar hnathawkte chu nikum July 1 khan an DA 31% a pek an nih tawh thu leh January, 2022-ah 3% vela tihpun leh mai tur nia a lan thu sawiin, hetihlai hian Mizoram sorkar hnathawkte chu 17% chauh pek an la ni a, DA pung chu sorkar hnathawkten an nghakhlel hle tawh tih an sawi.
A hun taka hlawh an lak theih nan leh an DA tipung tura chief minister an ngen bakah hian pensioner-ten harsatna an tawh chungchang pawh an thlen tel bawk a. “Hun eng emaw chen atang khan sorkar hnathawk an lo retire hian pension benefits an hmuh tur angte an hmu mai thei ta lo a,thla tin hlawh lak tur an neih tawh loh avangin pensioner-ten harsatna an tawk nasain an khawngaihthlak thei hle,” an ti.
Pensioner-te chungchang chu ngaihtuahsaka pension benefit an hmuh tur ang angte an hmuh thuai theih nana hma laksak turin FMGE&W chuan chief minister hi an ngen bawk.
Tar lan tawh thin angin sorkar sum harsatna avangin nikum lam hun eng emaw chen atang khan sorkar hnathawkten a hun taka hlawh an la thei lo a, heng an harsatnate sutkiansak tur hian FMGE&W chuan sorkarah ngenna an lo thlen fo tawh thin a ni.