Health Minister Dr R Lalthangliana’n Covid19 chi thar Omicron hmachhawn tura inpuahchah nan political party leh tlawmngai pawl te nen inrawn tlanna tum a nih thu a sawi.
Nimin khan State Level Expert Committee on COVID-19 Management (SLETOCOM) chu SAD Conference Hall, MINECO-ah an thukhawm a, he hun kaihruaitu Dr R Lalthangliana chuan Omicron in Mizoram ahnaihchilh tawh hle avangin ahmachhawn tura an inpuahchah ran a ngai tih a sawi.
Hemi chungchang hi Chief Minister Zoramthanga nen pawh an sawidun tawh thu leh arang thei ang bera Political party leh Tlawmngai Pawl zawng zawngte nen inrawn tlanna neih an tum tih Dr Thangtea chuan a sawi a,”He hrik thar kan hmachhawnna kawngah pawh hian tumah chi ai lova rilru fim taka kan hmachhawn tlan a tul dawn a ni,” a ti.
He thutkhawm ah hian Omicron lo hmachhawn tura inpuahchahna kawnga chet-lak dan tur hrang hrangte ngaihtuah a ni a, India ram pawn leh India ram chhung hmun dang atanga khualzin Mizorama rawn lut te sample endik leh khunghran dan tur chungchang te, hrikai te enkawl dan tur leh contact tracing kalpui chhunzawm dan turte leh Home Isolation chungchangte sawiho ani a, heng thila rawtna an neih te hi sorkar thuneitu sangte hnenah an thlen dawn a ni.
SLETOCOM chuan Covid Appropriate Behaviour tha taka zawm a pawimawh thu mipui ten hre thar leh se an duh thu sawiin, a bik takin mask vuah taimak a pawimawh thu leh All Mask Campaign thar thawh leh hial a tul thu an sawi bawk a ni.