Nigeria-ah mi sual rualin khua an rûnnaah mi 200 chuang that


Kar hmasaa sipaiten thlawhna hmanga Nigeria hmarthlang lam, Zamfara state-a an tawmna hmun an kah hrep hnu lawkah mi sual rual (bandit)-te chuan khua rûnin mi 200 vel an that.
Humanitarian Affairs Minister Sadiya Umar Farouq-a thupuangtu chuan mi 200 chuang phum an nih thu a sawi a ni.
“Hetianga inrûnna rapthlak tak hian mi a tihrehawm hle a, an chenna hmun chhuahsana tlanchhiate khawsak mek dan tur pawhin rilru a luah hle a ni,” tiin Pathianni khan AFP a hrilh.
State sorkar chuan beihna thlengah hian mi 58 an thi niin a lo sawi tawh.
Khaw hrang hranga mi tlanchhiate chu Inrinni khan an khuaah an let hlawm a, thite vuina hun hmangin mi 200 an tling daih niin Reuters news agency an hrilh.
Thawhtanni khan sipaite hian thlawhna hmangin Zamfara-a Gusami ramngaw leh Tsamre khaw thlang lam an bei chiam a. Hetah hian bandut 100 chuang thatin an zingah an hruai pahnih an tel.
Thawhlehni khan Zamfara-a motorcycle-a chuang silai keng mi 300 rual chuan khaw pariat luhchilhin an tawngpawng silai hmeh puahah mi 30 vel an thi.
Nilaini leh Ningani pawh khan Anka leh Bukkuyum district-a khaw 10 pawh bei lehin mi an kah bakah chenna inte an hal.
Kurfa Danya khuaa cheng pakhat, Babandi Hamidu chuan mi sualte hian an hmuh apiang an kap niin a sawi.
“Khaw 10-ah hian mi 140 phum an ni a, ruang dang pawh zawn zui mek zel an ni a, an chin hriat a ni hlawm lo,” tiin Hamidu hian AFP news agency a hrilh.
President Muhammadu Buhari chuan Inrinnia thuchhuah a siamah mi sual rualte tudawl tur hian sipaiten hmanrua an mamawh belh thu a sawi a. An ramah firfiak an hran thu sawiin, chhiah awl ru leh mi sual thuhnuaia khaw awm a awm tam thu a sawi.
“Tuna beihna thleng hi mi suatna chi khat a ni a, tunah hian kan sipaiten tha thlah lovin kan nawr let tawh ang,” tiin Buhari chuan a sawi bawk.
Buhari-a hian silai nena che mi sual rualte chu hrang hle mah se beihpui thlak an chawlhsan dawn lo tih a sawi.
Nigeria khawthlang lamah hian dan leh thupek kenkawh lamah sorkar a hlawhchham nasat avangin kum 2020 chawhnu lam atang khan tum khata mi tam tak ruk bo leh tharum thawhna a thleng nasa hle.
Nikum chhung khan bandit-te hian khawvel pum hriat hlawh tura sikul leh college an beihna leh zirlai za rual rual an hruai bo thute hriat tur a tam hle a. Zirlai tam zawk hi chhuah leh thin an ni a, tun thlenga hren pawh an la nei thung.
Bandit-te avanga buaina (bandit violence) hi a bul chu ran vulhtu leh lo neituten ram leh an ei zawnna atana tangkai an inchuhna vanga chhuak a ni a. Kum eng emaw zat chhung chu inngaihdam, inhriat thiam leh inbiak rem aiin pakhatin a tih chu phuba lak zel a ni ta a ni.
Sipaite chuan May thla atang khan heng lai hmunah hian bandit leh mi sual mi 537 an thah tawh thu leh mi 374 an man tawh thu kar hmasa khan an sawi a. An mi ruk bo mi 452 an chhanchhuak bawk niin an insawi.
Bandit-te hian thla hmasa khan an hruaitu pawimawh, Bello Turji chu sipaiten ramngawa an camp-te thlawhna leh lei atanga an beihnaah an chân a. Mi thiamte chuan kar hmasaa khaw rûn pawh hi an phuba lakna a nih an ring.
Nigeria-ah hian bandit-te hi “mi firfiak” tia sawi thin niin anmahni puitu, thu hrilhtu leh thlawptute pawh hremna na tak pek theih an ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427