Rengdil khuain Jan. 11 & 12-ah kum za tlin lawm dawn


Aizawl: Kum 1922, January 12-a din, Rengdil khua (Mamit dist) chuan tun thla ni 12 hian kum 100 a tling dawn a, centenary hi January 11 leh 12, 2022-ah lawmin, Minister of State K Lalrinliana leh bialtu MLA Lalrindika Ralte ten an telpui ang.
In zali chuang khua Rengdil hian tun thla ni 4 zan khan an lal hnuhnungber Lalzamanga te nupa an zalhna leh an lal lo ni tawhte ruhro an phumna hmuna Centenary monument an siamah an VCP ni mek TC Lalthantluanga hovin Centenary mei an det a. Hemi zan vek hian Rengdil khaw dintu zing ami Upa Darthangvunga fapa Upa KL Rokima’n Centenary Souvenir a tlangzarh bawk.
Centenary denchhen hian an khaw bula khaw hlui tlang an tih chu mipui tana tlawh nuam tura chei a ni a, Rengpuk leh a khaw hmingput chhan Rengdil te pawh mipui tan tlawh theih a ni dawn.
Rengdil khua hi Darsata Khiangte, Durtlang leh chhungkaw dang 11-in kum 1922-ah bawrhsap phalnaa an din a ni a. Darsata leh midang 10 ten kum 1922, January ni 8-ah Durtlang chhuahsanin, Tukkalh atangin chhungkaw pakhatin an lo zawm bawk a, January ni 12, 1922-ah an khaw dinna tur chu thlengin, helaia dil lo awm sa, Rengdil hming chawiin khua an din ta a. A hming put chhan dil hi Forest deptt-in an enkawl mek.
Darsata leh a thiante hian Rengdil khua hi Pathian lalna khua ni tura an din a ni a. Lal in hmun tur an thlan hmaa Biak In hmun tur thlang fel hmasain, kohhran pawh a ding nghal a. Kumin October-ah kohhran pawhin kum 100 tlin lawmna hi chhunzawm an tum.
Rengdil khaw din tura Durtlang atanga kalchhuakte hi – Darsata Khiangte; Tuahkima; R. Dala; Siala; Vunga; Darthangvunga (Dara); Zathulha; Zathina; Rosema; Ropianga leh Ngotawia (Sialchuhthanga) te an ni a, Tukkalh atangin Lalremapa te chhungin an lo zawm ve bawk a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427