Election Commission of India (ECI)-in thawh hniha Manipur assembly inthlan neih hun tur a puan hnuah state chhunga political party hrang hrangte chuan tlin ngei tumin inbuatsaihna an kalpui chhunzawm zel.
Manipur-ah hian thawh hnihin, February 27 leh March 3-ah mipuiten an aiawh tur thlangin vote an thlak dawn.
ECI-in Inrinnia inthlan hun tur a puan hnuah party hrang hrang chuan lawmawm an tih thu an sawi.
Manipur Congress chuan mipui, party worker leh an hruaitu, assembly inthlan chuh tumte chuan an party office atanga form la chhuak turin an ti.
Rorel lai, BJP chuan state chhunga an unit zawng zawngte chu ECI-in thu a pek angin meeting leh vantlang inkhawm huaihawt lo turin a hriattir tawh.
Manipur Legislative Assembly term kal mek hi March 19-ah a tawp dawn a. Bial 60-ah inthlan a ni dawn a, heng zinga bial 40 hi a duh apiang chuh theih a ni a, bial khat chu Scheduled Caste tana dah niin bial 19 dang chu Scheduled Tribe tana dah a ni ve thung.
ECI-in inthlan hun a puan rual hian model code of conduct (MCC) pawh hman tan nghal a ni bawk.
Manipur-ah hian thawh khat nan February 27-ah mipuiten vote an thlak dawn a, Manipur district panga – Imphal East, Imphal West, Churachandpur, Bishnupur leh Kangpokpi-ah inthlan hi neih tur niin bial awm zawng zawng zahve aia tam hret, bial 35-ah inthlan a ni ang.
Thawh hnihna atan March 3-ah mipuiin vote an thlak ve thung dawn a. Districts paruk – Ukhrul, Tamenglong, Senapati, Jiribam, Thoubal leh Chandel district-a bial 25-a miten vote an thlak ang.