Pakistan hmar lama vur tla nasa lutukin kawngpui a dan avanga an lirtheia tang mi za tel chu chhanchhuah an ni a, kawngpui pawh tihtlang leh tawh a ni.
Police chuan tlang chhipa khua, Murree tlawha zin chhungkaw 500 vel zet thlasik vur tla avang hian an tang niin an sawi.
An zinga mi 22 phei chu an thi a, heng zingah hian chhungkaw khata mi pariat leh chhungkaw danga mi panga an tel tih thuneitute chuan an sawi.
Zirtawpnia vur tla leh thli nasa taka tleh avangin thingte tluin Murree panna leh chhuahna a dang a ni.
An lirthei chhunga tangte chu an zavaiin chhanchhuah an ni tawh a, khuaah hian an awmna tur siamsak an ni a, hei hi tuipui zawl atanga metre 2,300 vel zeta sang a ni.
An awmnaah hian gas leh tui a harsa hle a; mahse, khuaa chengte leh thingpui dawr siamten awmna tur, chaw leh puan lum an ngaihtuahsak a ni.
A bul hnai khua, Nathiagali-a thuneitu, Tariq Ullah chuan darkar reilo te chhungin vur hi feet li atanga nga vela chhah a tla hman tih AFP news agency hnenah a sawi.
“Vur a sur a ni mai lo va, a sur nasa pawh a ni lo, rinphak baka tam a tla a ni,” a ti a. “Thli na tak tlehin thing a kar tlu a, vur a tawlh bawk a, a bul vela chengte hi kan hlau hle a ni,” a ti.
Social media-a thlalak leh video thehdarhah chuan lirtheite chu a bumper chin hnuai lam a pil vek a, a chungah vur sang takin a intiang hlawm bawk.
Thi zinga 10 chu naupang an ni a. Police chuan mi paruk chu an car chhunga khaw vawtin a hmeh hlum an ni a. Mi dangte erawh lirthei up taka an tawm avangin boruak thawk tur tlakchham vanga thi an nih theih hlawm thu an sawi.
Zirtawpni khan an tan thu hi hriat niin chhanchhuah tuma bei nghal char char an ni.