l
Uttar Pradesh-a state assembly inthlan neih hma lawkin BJP leh Yogi Adityanath-a sorkar tana hekna lian tak thlengin a minister langsar tak leh MLA pathum chuan party chhuahsanin an elpui ber, Akhilesh Yadav-a an zawm.
Yogi-a sorkara minister lawk leh hnam hnufual zawkte hruaitu langsar, Swami Prasad Maurya-a chuan a bânna lehkha a thehluh chu Twitter-ah a tar lang.
Mayrya-a’n a bâng tih a puan hnu lawkah hian BJP MLA pathum -Roshan Lal Verma, Brijesh Prajapati leh Bhagwati Sagar te chuan an bânna an thehlut zui ve nghal.
OBC (Other Backward Class) hruaitu chak tak leh vawi nga lai MLA lo ni tawh, Maurya-a hian kum 2016 khan Mayawati kaihhruai Bahujan Samaj Party (BSP) chhuahsanin BJP a zawm a. BJP-in Yadav-a kaihhruai, Samajwadi Party lak a\anga OBC-te vote an hmuh theihna atana thawh hlawk tak a ni zui.
A hnung zuia BJP chhuahsan MLA pathumte pawh hi BSP a\anga BJP zawma SP-a kal leh an ni ta bawk.
Twitter-a a bânna lehkha a tar lanah Maurya chuan, “Thuthlung inang lo chungin Yogi Adityanath-a cabinet-ah telin rim takin ka thawk a; mahse, Dalit, OBC, lo neitu, hna nei lo leh sumdawng tenaute rahbeh zel an nih avangin ka bânsan ta a ni,” tiin a inziak.
Akhilesh Yadav-a pawhin Maurya nena an thlalak chu Twitter-ah vek a tar lang zui nghal a, an party-ah amah leh amah thlawptuten an lo lawm thu a tar lang.
Deputy Chief Minister Keshav Prasad Maurya chuan Twitter-ah vek Maurya bân chhan a hriat loh thu leh inbiaa sawi \hat a duh thu a tar lang.
Lucknow-a an party chhuahsan an awm mek lai hian Yogi leh BJP hruaitu lawkte chu Delhi-ah an inthlan tur sawiin an inhmu khawm.
Maurya-a hi Uttar Pradesh khawchhak lam, Padrauna bialtu BJP MLA a ni a. A fanu, Sanghamitra chu BJP MP a ni bawk.
Uttar Pradesh hi India-a politics laimu a tling a. February 10 a\ang hian thawh sarihin an inthlang dawn a, kum 2024-a ram pum inthlan tur atana thlir lawkna pawimawha ngaih a ni a. March 10-ah vote tlate chhiar a ni ang.
Uttar Pradesh-a Akhilesh Yadav-a nen an campaign dawn tih sawi chiang tawh, Nationalist Congress Party (NCP) leader Sharad Pawar chuan Maurya-a hian hruaitu dang pawh a hruai lut zel dawn tih a sawi.
“UP-ah hian inthlakna a lo kal mek a. Vawiinah Maurya-a leh MLA pathum an lo kal a, nakinah mi dang pawhin an rawn zui tih kan hmu ang,” tiin Mumbai atangin a sawi.