Champhai NGO Coodination Committee chuan Champhai District Hospital-a dah tawh RT-PCR khawl chu sorkar kum 2021-2022 chhung ngeia bun fel turin Mizoram sorkar an phut a; hetihlai hian Lungleia RT-PCR Laboratory hawn chu hman theih a la ni lo.
Thawh\annia an \hutkhawm zawha thuchhuah an siamah Champhai NGO Coodination Committee chuan tun thlenga UNICEF-in Champhai District Hospital tana a pek, RT-PCR khawl bun fel a la ni lo chu pawi an tih thu sawiin, hripui a lo darh zel nen, sorkar kum kal mek chhung ngeia bun turin sorkar an ngen nawn tih an sawi.
Nikum October 12 khan Champhai South MLA, Minister of State TJ Lalnuntluanga’n RT-PCR khawl hi District Hospital Medical Superintendent Dr. Zatluanga hnenah a hlan a, October, 2021 ral hma ngeia bun turin NGO Co-odination Committee chuan sorkar an lo ngen tawh a, tun thlengin bun a la ni lo thung.
Hetihlai hian Health Minister Dr R Lalthangliana’n nikum December 30-a Lunglei Zotlang Tourist Lodge-a RT-PCR khawl hman theih tura a hawn chu nimin thlengin a taka hman theih a la ni lo.
Hemi chungchangah hian Lunglei Civil Hospital Medical Superintendent Dr SR Ngurchamliana chuan kar kalta atang khan enchhinna, trial run ni tin an neih thu sawiin, duhthusama dik result an la hmu thei lo a, hetiang hi a nih vang hian tun kar chhoah pawh enchhin zel tum a nih thu a sawi.
Lungleia RT-PCR khawl hman phalna hi NEIGHRIMS, Shillong kaltlangin ICMR-in a pe dawn a, enchhinnaah za a za a dik a nih chuan mamawhna a san tawh avangin ICMR pawh hian phalna pek hi an hreh lo hle nia thudawn a ni.