Luhka pawimawhah covid test neih a hun leh tawh
Covid-19 hri leng a hluar thar leh hle mai a, thingtlang khaw tam zawk phei chuan inkharkhip neih leh an duh tan tawh bakah, mikhual lutchhuak awm lo thei zawnga awm an rilruk a, hmanraw nei tha lo zawk an nih miau avangin, an thiam leh hriat dan ang anga ro an relte hi an hriatthiampuiawm viau.
Sorkar pawhin theihtawpin thawh thumna lo thleng tur laka invenna a kalpui tan a, ramri leh hmun dang atanga lo lutte hnenah test a nei leh tan bawk nia hriat a ni. Hetih lai hian ramri dep khaw hrang hrang a tam si a, a hmun pawimawh chin hi chu tlemte anih avangin hri leng laka him ngei an rawn luh theih nan Covid test lo nei zel thei se a tha leh tawh hle.
Mizoram luhka, Vairengte leh Bairabiah khualzinte Covid-19 test mek niin, luhka hmun dangah pawh test neih a nih theih nan Kolasib district thuneituten Mizoram sorkarah dilna an siam leh tawh a, Kolasib bawrhsap leh a hote hmalak thinna hi a fakawm thei hle. A point tur takah zel hian hma an la nite pawhin a lang a, awmze awm lova hmalakna thawm an neih a hriat ve lem loh a, sorkar pawhin an rawtnate hi tihhlawhtlinsak thei se a tha hle.
District dangah pawh thenawm state te nena inkalpawhna luhka kan nei nual a, hengah te hian covid test lo neih leh zel ni thei se la, kan ram leh mipui him zel nan pawh a tangkai hle ang. Inbuatsaihna a that phawt chuan buaina zualpui thleng thei tur tam zawk hi chu kan pumpelh thei a, test hi kan uar lehzual a, hemi tur hian sorkar pawhin ruahmanna a siam thar zel a tha hle. Ramri kana lo lutte dinhmun hi kan ngaihtuah thar leh a va ngai em.