Gauhati High Court chuan Thawhlehni khan Assam sorkar chu state police-in nikum May a\anga a lema mi an beih (fake encounter) chungchangah chawlhkar hnih chhunga affidavit thehlut turin a ti.
Dan hre mi pakhat, Arif Jwadder-a petition thehluh ngaihtuahtu, justice pahnih, Sudhanshu Dhulia leh Soumitra Saikia te \hutna division bench chuan affidavit hi Secretary (Home) emaw, Additional Secretary (Home) emawin thehlut turin a ti.
Thla hmasaa petition a thehluhah hian Jwadder-a chuan May, 2021 a\ang khan fake encounter 80 thlengin hengah hian mi 28 thiin mi 48-in hliam an tuar niin a sawi.
January 3 khan court chuan Assam sorkar Advocate General Devajit Saikia chu police-in mi sual bei anga inchhala mi an beihna chungchanga puhna hi sawi fiah turin a lo ti tawh a. Thawhlehni khan Saikia hian he thilah hian magisterial inquiry tih a ni tih a hrilh.
Petition thehluttu aiawha ding, advocate hlun leh Additional Solicitor General of India lo ni tawh, Indira Jaising chuan inquiry engmah hmuh tur a awm loh thu leh court chu state police-te hnenah FIR ziah luh a awm a nih chuan FIR-te website-a tar lang tura ti turin a ngen.
Jwadder-a’n petition a thehluhah hian high court chu fake enconter nia sawi awmte lakah FIR thehlut tura ti tur te leh court kaihhruaina hnuaia Central Bureau of Investigation (CBI), Special Investigation Team (SIT) leh state dang police team ten chhui tura ti turin a ti bawk.
Fake encounter nia sawite chu Gauhati High Court-a la \hu lai judge kaihhruaia judicial inquiry tih leh a tuartu chhungte hnena zangnadawmna sum pek chungchang pawh chhui a duh thu a thlen bawk.
Petition thehluttu, Jwadder-a chuan fake encounter nia sawia mi an thah hian an mi thahte hian a vengtu police-te silai chhuha an beih \hin thu an sawi chu ni theia a ngaih loh thu a sawi a. “Uluk taka train chhuak police officer-in a kawnga a hren beh tlat a service revolver chu chhuha beih an tum \hin hi thil theih a ni lo,” tiin a petition-ah hian a ziak lang.
Police-in thil thlen dan an sawiah silai chhuhtu nia an sawite hian silai an hmeh puah thu pawh an sawi ngai lo niin a ziak a, heng thil hi zanah a thleng zel a, mi thahte hi ralthuam nei lo leh an kut phuar an ni \hin bawk tih a sawi.